Բժիշկը մանրամասներ է պատմում երեկվա վիրավորների վիճակից (video)

16:30 գնացի հերթապահության, տեսանք մաշինա եկավ, մեր վիրավոր սալդատները բերեցին,-  պատմեց Տեղ գյուղի մանկական բժիշկը։
Նրա խոսքով՝ խուճապի չեն մատնվել, մի մարդու պես սկսել են վիրավորներին առաջին բուժօգնություն ցուցաբերել։

«Երեք զոհված բերեցին, չորս վիրավոր»,- նշեց մեր զրուցակիցը։

Ապա, ցույց տալով իր տան պատշգամբից դեպի Արցախ տանող ճանապարհը, շարունակեց.
«Դրա վերևում մոստ կա, դրա մոտ թուրքերը պոստ են դրել ու մեզ հսկում էին։ Հետո իմացանք, որ մեր տղերքն էլ տեխնիկա են վերցրել, գնացել պոստ սարքեն, որ հսկեն թուրքերին, տեսնեն՝ ինչ են անում, ոնց են անում։ Էն էլ եկել, ասել են, թե դուք ինչ եք էստեղ անում, գնացեք։ Մերոնք էլ ասել են, որ իրենք չպետք է մեզ ասեն»,- պատմեց մեր զրուցակիցը։

Նա տեղեկացրեց, որ մի ժամանակ գյուղի ինչ-որ հատվածում թուրքերն իրենց ոչխարներին են պահել, այստեղից թույլտվություն են վերցրել, մերոնք էլ չեն մերժել։

«Հետո արդեն այդ թուրքերը եկել են, ասել, թե այդ տարածքն իրենցն է։ Իրենք նագլի եկել են, էնտեղ կանգնել, մերոնք էլ ուզել են պոստ սարքել, որ իրենց նայեն։ Կարծեմ, այնտեղ Վայքից տրակտորիստ է եղել, որի աչքին են խփել։ Հինգին մեքենաները արդեն վիրավորներին էին բերում»,- պատմեց նա։

Հարցին, թե ադրբեջանցիների հետ խաղաղ ապրել կարո՞ղ են Տեղի բնակիչները, մեր զրուցակիցը կտրուկ պատասխանեց՝ ոչ։

«Թուրքի հետ ի՞նչ խաղաղություն։ Ինչքան մենք էստեղ ապրում ենք՝ 1989-ից, սկսված է եղել Արցախյան առաջին պատերազմը։ Ահավոր է եղել, գրադներն էստեղից գալիս էին։ Քանի տուն է ավերվել»,- հիշեց նա։

Մանրամասները՝ տեսանյութում։