44-օրյա պատերազմին Սերժ Սարգսյանն ասաց՝ Նիկոլն ինչ է անելու ու ինչ գնով է կանգնելու պատերազմը․ Շահնազարյան (video)

Ըստ Լավրովի պլանի 5 շրջաններից դուրս են գալիս Արցախի ուժերը, երկու շրջան՝ Քելբաջար եւ Լաչինի, մնում են այնքան ժամանակ, քանի դեռ ազատ կամարտահայտությամբ ԼՂ կարգավիճակի հարցը որոշված չէ: Այս մասին, այսօր՝ մարտի 7-ին, ՀՀ երրորդ նախագահ Սերժ Սարգսյանի մոտեցումները մեկ ժողովածուի շրջանակներում ներկայացնող՝ «Բանակցային առաջնագծում» գրքի շնորհանդեսի ժամանակ նշեց արցախյան առաջին պատերազմի ժամանակ Հայաստանի նախագահի հատուկ հանձնարարարություններով դեսպան Դավիթ Շահնազարյանը:

«Դա, ըստ էության, կամ նշանակում է հավերժ, կամ Ադրբեջանը պետք է համաձայնի անցկացնել հանրաքվե: Հայկական կողմի դիրքորոշումն է, որ որեւէ ժամկետ հանրաքվեի վրա չպետք է լինի: Բոլորն էլ գիտեին, որ այդ հանրաքվեն չի լինելու եւ այդ կարգավիճակը պահպանվելու է, միջազգային խաղաղապահի ուժերը կանգնելու էին այնտեղ: Դա նշանակում էր, որ Լաչինի, Քելբաջարի շրջանները եւ ԼՂ-ն տարանջատվում էին Ադրբեջանից անվտանգության մեխանիզմներով:

2018-ից հետո նախագահ Սարգսյանը փակագծեր է բացել, որ պետք է երեք փաստաթղթեր լինեն՝ Հայաստան-Ադրբեջան փաստաթուղթ, դրանից հետո եռանախագահող երկրների հայտարարությունը, եւ դրանից հետո ՄԱԿ-ի ԱԽ որոշումը: Սա է եղել այս իշխանության ստացած ժառանգությունը»,- ասաց Շահնազարյանը՝ հիշեցնելով, որ այն տարածքները, որտեղից ԼՂ ուժերը դուրս էին գալու, դրանք բոլորը պետք է լինեին ապառազմականացված:

Շահնազարյանի խոսքով՝ իր ներկայացրածն այժմ երազանք է թվում ներկայի հետ համեմատած, սակայն իրականում սա եղել է շատ մոտ իրականությանը: