Մեր անմեղությունը մենք այնտեղ կապացուցենք. Սեյրան Օհանյանը՝ իր դեմ կարված գործի մասին (video)
ՀՀ իշխանությունների համար դեռևս գերակա չեն այն խնդիրները, որոնք վերաբերում են անվտանգությանը, պաշտպանությանը, Զինված ուժերին, բանակին, Արցախին, խորհրդարանական ճեպազրույցների ընթացքում հայտարարեց ԱԺ «Հայաստան» խմբակցության ղեկավար Սեյրան Օհանյանը։
Պատգամավորն ասաց, թե դատախազության կողմից ընդդիմադիր պատգամավորների նկատմամբ հետապնդում հարուցելու միջնորդագրերի ներկայացմանը չեն մասնակցել, քանի որ դրանց բոլորի վաղեմության ժամկետն անցած է։
«Եվ եթե մենք ստորագրեինք, ապա չէին լինի այդ միջնորդագրերը, իսկ մենք հրաժարվել ենք ստորագրելուց, քանի որ գտնում ենք, որ մեղավոր չենք։ Այդ գործերը շինծու են, որևիցե շահ որևիցե մի հարցում մենք չենք ունեցել, որևիցե մի շրջանակի հետ մենք պայմանավորվածություն չենք ունեցել», - ասաց Սեյրան Օհանյանը։
Բացի այդ, ըստ պատգամավորի, ընդդիմադիր խմբակցությունները չեն մասնակցել նիստին, քանի որ համարում են, որ իշխանությունների կողմից դրանք իրականացվել են հանրության ուշադրությունը շեղելու համար։
«Չենք մասնակցել նաև, քանի որ մեծամասնությունը, ինչպես մնացած բոլոր հարցերը, դակելու էր նաև այդ հարցը։ Իսկ մենք պատասխանատու չենք ՔՊ-ական մեծամասնության առջև։ Մեղադրանքն առաջադրվել է, գործերը գտնվում են դատաիրավական համակարգում, մեր անմեղությունը մենք այնտեղ կապացուցենք», - նշեց Օհանյանը։
Հետևեք մեզ Viber-ում
