SOCAR-Իրան համագործակցությունը վերականգնվեց

Reuters լրատվական գործակալությանը տված հարցազրույցի ժամանակ SOCAR Trading ընկերության (ադրբեջանական SOCAR պետական ընկերության առևտրային ստորաբաժանում) գործադիր տնօրեն Արզու Ազիմովը հայտարարել է, որ իրենք մտադիր են վերսկսել Իրանի հետ գործարքները և դուրս գալ նավթի ու գազի նոր շուկաներ: «Մենք մինչ այս Կասպյան տարածաշրջանում ակտիվորեն առևտուր ենք արել Իրանական ազգային նավթային ընկերության (NIOC) հետ, ինչը շարունակվել է այնքան ժամանակ, մինչև որ Իրանի դեմ սահմանվել են միջազգային պատժամիջոցներ։ Այժմ՝ դրանց վերացումից հետո, գոյություն ունի մեծ պոտենցիալ, որն անհրաժեշտ է ուսումնասիրել»։ Նրա խոսքերով՝ գոյություն ունի նաև Պարսից ծոցում Իրանի հետ նավթամթերքների առևտրի հնարավորություն, ուր ԱՄԷ-ի Ֆուջեյրա նավահանգստում SOCAR-ն ունի դրանք պահպանելու հզորություն. «Տարբերակներից մեկն Իրանին բենզին մատակարարելն է ու նրանից նավթ և հեղուկացված նավթային գազ գնելը»։