Վահեն բանտից անակնկալ է արել. հուզիչ ու ապրեցնող /ֆոտոշարք/

«Շանթ և ընկերներ» գործով ամենաբարձր պատժաչափով դատապարտվեց Վահե Մկրտչյանը: Հարազատների և ճանաչողների բնութագրմամբ` բարի, ազնիվ, հայրենասեր ու ընտանիքին նվիրված Վահեն: Ողջ դատավարության ընթացքում Վահեն հավատարիմ մնաց իր դավանած սկզբունքին, որ ինչպես նշում է կինը` Մարգարիտա Ստեփանյանը  նա ամեն բան անում է, որ շարունակի պարզ հայացքով նայել դուստրերի աչքերին: Վահե Մկրտչյանը կալանավայրում է, սակայն նրա մեջ ապրում է հոգատար ամուսինը, հայրենասեր հայ  և սիրող հայր լինելու գաղափարները: Այս մասին Հայելի.am-ի թղթակցի հետ զրույցում հայտնեց Վահեի կինը` Մարգարիտան, որը օրերս այցելել է ամուսնուն: «Իմ հիշողության մեջ թարմ է մեր համատեղ առաջին նոր տարին, հետո ավագ դստերս ծնունդը, ապա երկրորդինը ու մենք բոլորով երջանիկ էինք: Մենք երջանիկ էինք, որ բալիկներ ունենք ու Ամանորը ընտանիքով էին նշում: 2013 թվականից սկսած` մենք առանց Վահիկի ենք նշում նոր տարին ու դրանք մեր ամենատխուր նորտարիներն են»,-ասաց Մարգարիտան: Մարգարիտան տեղեկացրեց, որ ամեն բան արվում է, որ երեխաների կապը չկտրվի հայրիկի հետ .«Օրերս այցելել ենք Վահիկին ու երեքս էլ ամանորյա նվեր ենք ստացել` զարդատուփեր, որոնց հաստատ կպել է ամուսնուս ձեռքը, որովհետև նա գեղարվեստի ուսումնարանի փայտի փորագրության բաժինն է ավարտել»,-կիսաթաց աչքերով պատմեց սիրող կինը: Մարգարիտան ցավով նշեց, որ դուստրերը Ձմեռ պապիին նամակ են գրել ու խնդրել իսկական կիթառ, սակայն ինքը հիասթափեցրել է բալիկներին հայտնելով ճշմարտությունը.«Ասեցի` երեխաներ Ձեր Ձմեռ պապիկը հայրիկն է, ու քանի դեռ նա տուն չի եկել Դուք դժվար նման նվեր ստանաք Ձմեռ պապիկից, նրանք տխրեցին, բայց հասկացան ու կսպասեն….»հուզմունքը մի կերպ զսպելով ասաց Մարգարիտան: Մարգարիտան հայ ժողովրդին և իր բալիկներին մեկ մաղթանք ունի.«Թող Ձմեռ պապին բերի արդարության բանալին ու բացվեն բոլոր այն դռները, որոնք անարդարությամբ են փակվել:Թող իմ և մնացած բոլոր բալիկները իրենց հայրիկների գրկում դիմավորեն Նոր տարին»,-եզրափակեց Վահե Մկրտչյանի կինը: Հիշեցնենք, որ «Ազգային միացյալ նախաձեռնության» ղեկավար Շանթ Հարությունյանը 2013թ. նոյեմբերի 5-ին իր աջակիցների հետ Գայ Ֆոքսի դիմակներով «Անոնիմուսների երթ» էր սկսել Ազատության հրապարակից։ Ոստիկանները Մաշտոցի պողոտայում կասեցրել էին երթը, տեղի էին ունեցել բախումներ, հնչել էին պայթյուններ, ոստիկանները բերման էին ենթարկել 38 ակտիվիստների։ Բախումների հետեւանքով տուժել էր 16 մարդ, այդ թվում` ութ ոստիկան: Հարուցված քրեական գործի շրջանակում մեղադրանք էր առաջադրվել 13 մարդու։ Դատավոր Մնացական Մարտիրոսյանը 2014թ-ի հոկտեմբերի 17-ին Շանթ Հարությունյանին դատապարտել էր 6 տարվա ազատազրկման։ Ամաշատ պատժաչափը` 7 տարվա ազատազրկում ստացավ Վահե Մկրտչյանը: Այս տարվա փետրվարին Վերաքննիչ քրեական դատարանն անփոփոխ է թողել առաջին ատյանի որոշումը: Վճռաբեկը բողոքը վարույթ չէր ընդունել: Լուսինե Ղազարյան