Ալիևը խորամանկ խաղը տանում է այնպես, որ ռուսները հեռանան Հայաստանի «ձեռքով»

Երեկ համացանցում մի այնպիսի տեղեկություն հայտնվեց, որն անգամ ռուս փորձագետներն էին հրաժարվում մեկնաբանել:

Արցախի մարդու իրավունքների պաշտպան Գեղամ Ստեփանյանը Թվիթերում ներկայացրել էր մի տեսանյութ, որում ռուս խաղաղապահը մոտենում է բնապահպաններ ներկայացող ադրբեջանցիներին, խնդրում ճանապարհ բացել դեպի Լաչինի միջանցք խաղաղապահների ավտոշարասյան համար։

Այնուհետև, Ադրբեջանցի «էկոակտիստների» կողմի մերժվելով նա հրամայում է շրջվել ռուսական բեռնատարների շարասյանը և հետ գնալ։ «Ադրբեջանական կեղծ հորինվածքի ևս մեկ ապացույց», - գրել էր Գեղամ Ստեփանյանը:

Մինչ այս ցնցող տեսարանը պտտվում էր համացանցում՝ Ռուսաստանի պաշտպանության նախարար Սերգեյ Շոյգուն ՊՆ ընդլայնված կոլեգիայի նիստում հայտարարեց, որ Ռուսաստանի զինված ուժերը 2023թ. կշարունակեն «հատուկ ռազմական գործողությունները» Կիևի դեմ, ինչպես նաև կշարունակեն իրենց առաքելությունը Սիրիայում և Լեռնային Ղարաբաղում: «Շարունակել հատուկ գործողությունների անցկացումը՝ մինչև առաջադրանքների լիարժեք կատարում: Ռուսական զորամիավորումներին՝ ապահովել խաղաղության և անվտանգության պահպանումը Լեռնային Ղարաբաղում և Սիրիայում»,- նշել է Շոյգուն՝ թվարկելով ռուսական բանակի առաջնահերթությունները:

Այսօր արդեն Ռուսաստանի արտգործնախարար Մարիա Զախարովան հայտարարել է, որ ռուս խաղաղապահները բարեհաջող կատարում են իրենց առաքելությունը Ղարաբաղում՝ ի հեճուկս Հայաստանի վարչապետ Նիկոլ Փաշինյանի հայտարարության: Նրա խոսքով ռուս խաղաղապահներն անում են ամեն բան՝ տարածաշրջանում իրավիճակի կայունացման համար: «Իրենց պարտականությունը ռուս խաղաղապահները կատարում են… Հենց ռուս խաղաղապահներն են անում ամեն բան՝ իրավիճակի կայունացման համար, և նրանց մոտ դա ստացվում է: Ուստի չի ընդունվում նման վերաբերմունք խաղաղապահների նկատմամբ»,- ասել է Զախարովան:

Իր հերթին Ռուսաստանի արտգործնախարար Սերգեյ Լավրովը հեռախոսազրույց է ունեցել Ադրբեջանի արտգործնախարար Ջեյհուն Բայրամովի հետ: Ռուսաստանի ԱԳՆ հաղորդագրության մեջ նշվում է, որ քննարկվել է ռուս խաղաղապահ զորամիավորման պատասխանատվության գոտում ստեղծված իրավիճակը, որը սրվել է Լաչինի միջանցքի փակման և տարածաշրջանում հանքավայրերի մշակման հետ կապված կողմերի տարաձայնությունների պատճառով: Սերգեյ Լավրովն ընդգծել է, որ անհրաժեշտ է անշեղորեն կատարել եռակողմ պայմանավորվածությունները Լաչինի միջանցքով Լեռնային Ղարաբաղի և Հայաստանի միջև անխոչընդոտ կապն ապահովելու համար: «Ափսոսանք են հայտնել, որ Երևանը որոշել է հրաժարվել Հայաստանի և Ադրբեջանի արտգործնախարարների միջև ս.թ. դեկտեմբերի 23-ին Մոսկվայում նախատեսված հանդիպումից՝ քննարկելու խաղաղության պայմանագրի նախապատրաստման հարցեր»,- ասվում է հաղորդագրության մեջ: Նշվում է նաև, որ ընդգծվել է բոլոր եռակողմ հայտարարությունների իրականացման ռիթմիկ աշխատանքը շարունակելու կարևորությունը:

Ադրբեջանն ընդդեմ ռուս խաղաղապահների լուրջ արշավ է սկսել: Նպատակը պարզ է՝ ռուս խաղաղապահներին սադրել, որպեսզի նրանք կոշտ վարվելաձև դրսևորեն, իսկ Բաքուն պահանջ դնի՝ նրանց հեռացնելու Լեռնային Ղարաբաղից:

Բայց ամբողջ խնդիրն այն է, որ Բաքուն այդ խաղը տանում է այնպես, որ պաշտոնական Երևանի ձեռքով ռուսները հեռանան:

Պաշտոնական Երևանն արդեն Արցախի շուրջ իրավիճակի պատասխանատու է հայտարարել Ռուսաստանին, իսկ Բաքուն ցույց է տալիս, որ կարող է ռուս խաղաղապահներին թույլ չտալ, որ նրանք տեղաշարժվեն: Սա ոչ այլ ինչ է, եթե ոչ սադրանք ընդդեմ Մոսկվայի:

Ու Փաշինյանի իշխանությունն այս վիճակում, փոխանակ, փորձի Մոսկվայի հետ ստեղծված բարդ իրավիճակը հանգուցալուծի՝ ի օգուտ հայկական կողմի, հակառակն է անում՝ ընդդեմ ռուսական ջանքերի քարոզարշավ է սկսել: Իշխանության ներկայացուցիչները մեկը մյուսի հետևից հարցազրույցներ են տալիս, ու ասում են՝ «սաղ ռուսն ա մեղավոր»:

Իսկ ռուսը մնացել է «երկու քարի արանքում»:

Մետաքսյա Շալունց