Ռուբեն Վարդանյանը լայվով վերջին տեղեկություններն է փոխանցում Ստեփանակերտից (video)

Արդեն 72 ժամ է, որ Արցախը շրջափակման մեջ է, ես հպարտ եմ, որ ձեզ հետ ապրում եմ այստեղ, որովհետեւ մենք անցնում ենք այս ճգնաժամը շատ պարկեշտ: Այս մասին ֆեյսբուքի իր էջի լայվում հայտարարել է Արցախի պետնախարար Ռուբեն Վարդանյանը:

«Ես մեծ հավատ ունեմ, որ մենք ամեն ինչ հաղթահարելու ենք, որովհետեւ այն ուժը, որ ես տեսնում եմ ձեր մեջ, ինձ տալիս է մեծ էներգիա: Սա նոր իրավիճակ է, եւ մեր կյանքում շատ բան դժվարացել է: Դա արվել է նրա համար, որ մենք հնարավորինս երկար դիմանանք այս իրավիճակին: Մարդկանց մեծամասնությունը դա գիտակցաբար ընդունում է:

Ցավոք սրտի, կան մարդիկ, ավելի շատ ունեւորների կողմից, որոնք չեն հասկանում, որ անձնական զանգերով կամ անձնական խնդրանքներով ոչ մի հարց չի լուծվելու: Բոլորի նկատմամբ նույն մոտեցումն է լինելու: Ես գիտեմ դեպքեր, որոնք անթույլատրելի են եւ ես թույլ չեմ տալու դա շարունակվի, մարդիկ պատիժ են կրելու, եթե օգտագործելով իրենց հնարավորությունները, փորձեն ինչ-որ հարցեր լուծել:

Ես գիտեմ, որ մի քանի տեղերում փորձել են գները բարձրացնել»,-ասաց նա:

Ռուբեն Վարդանյանը հիշեցրեց, որ գործում է 119 համարով թեժ կապ, մարդիկ կարող են նման դեպքերի դեպքում ահազանգել եւ բոլոր դեմքերը կստուգվեն:

«Մենք բոլորս հավասար են: Մեր հաղթելու միակ ճանապարհն այն է, որ բոլորս միասին հավատանք, որ ոչ մի խումբ չկա, որ ավելի շատ իրավունքներ ունեն, քան մյուսները:

Ես գիտեմ, որ ադրբեջանցիները տարբեր բամբասանքներ են տարածքում, մի հավատացեք այդ բամբասանքներին: Երբ ադրբեջանցիներն ասում են՝ մենք կթողնենք, որ ձեր մեքենաներն անցնեն, իրենք ո՞վ են, որ մեզ թողնեն, կամ չթողնեն: Իրենք իրավունք չունեն այդ ճնապարհին գտնվեն եւ որոշումներ կայացնել: Իսկ ո՞վ է որոշում կայացնում, ինչ-որ մի կին, որ հայտարարում է, թե ինքը մարդու իրավունքների պաշտպանության ինչ-որ կազմակերպության անդամ է: Հայտարարությունները, թե հնարավորություն կա մեքենաներով անցնելու, մի ընդունեք որպես իրականություն, դա սուտ է: Իրենք պետք է դուրս գան այդ ճանապարհից եւ այդ ճանապարհից օգտվելու ենք միայն մենք:

Այս իրավիճակում իհարկե, կան շատ դժվարություններ, ինչ-որ բաներ պետք է փոխվի: Օպերատիվ շտաբը ստեղծված է նրա համար, որ շատ արագ արձագանքի, մենք աշխատում ենք 24 ժամ, հարցերին, զանգերին պատասխանում ենք: Ես վստահ եմ, որ մենք այս ամենը հաղթահարելու ենք, իրար հետ միասին բերելու ենք նոր վիճակի, որ զգանք, որ ապրում ենք մի համախմբված հասարակությանմեջ, որտեղ բոլորս հավասար ենք: Այդպես եղել է Արցախում 1990-ականների սկզբին, երբ փողն ու պաշտոնը չէր թունավորել մեզ: Մենք միասին հաղթահարելու ենք բոլոր դժվարությունները: Շնորհակալ եմ, որ այսպես ընդունում եք այս իրականությունը»,-ասաց նա: