Ալենի վերջին սրիկայությունը հայ ժողովրդի դեմ (video)
ՀՀ ԱԺ նախագահ Ալեն Սիմոնյանը խորհրդարանի ամբիոնից անդրադարձավ Լաչինի միջանցքում ստեղծված իրավիճակին ու մի քանի արձանագրումներ արեց:
«Կարծում եմ՝ մեր հարևան երկրներում և ոչ միայն անմիջականորեն հարևան երկրներում, դեռ չեն հասկացել, որ Հայաստանում կան կարմիր գծեր: Այդ կարմիր գծերը մեզ համար հստակ են: Նման գործողություններով մեզ բան պարտադրել չի լինի: Էլ տեղ էլ չկա որեւիցե բան պարտադրելու, մենք դր մասին ասել ենք: Կարծում եմ՝ իմ ակնարկը տեղ կհասնի ու կհասկանան:
Ադրբեջանը հաճախ հայտարարում է, որ իրենք ուզում են Արցախի բնակչությունն այն իրավունքներն ունենա, ինչ իր քաղաքացիներն ունեն: Դա ո՞րն է՝ պատանդի կարգավիճակ ունենալը, անջատված գա՞զը, թե՞ բժշկական օգնություն չստանալը:
Երկրորդ արձանագրումը, որ կուզենամ անել, դա միջազգային դիտորդական մանդատի արձանագրումն է: Այո, սա ի ցույց է դնում, որ մենք պետք է շատ լրջորեն զբաղվենք և մեր միջազգային գործընկերների հետ զրուցենք միջազգային մանդատի մասին, ինչու ոչ՝ Մինսկի հարթակի 12 անդամ երկրների դիտորդական առաքելություն Արցախի տարածքում ունենալու մասին»,- ասաց Սիմոնյանը:
Ինչ վերաբերում է ՌԴ խաղաղապահների մանդատին, Սիմոնյանը հայտարարեց. «Անկախ նրանից՝ մենք այս պահին բավարարվա՞ծ ենք, թե՞ բավարարված չենք, այնուամենայնիվ, սա ևս մեկ անգամ ի ցույց է դնում, որ խաղաղապահ ուժերն այնտեղ անհրաժեշտ են, եւ պետք է երկարաձգվի մանդատը: Գուցե մենք պետք է դիտարկենք ոչ միայն ՌԴ խաղաղապահների, այլև միջազգային այլ ֆորմատների միջոցով այնտեղ հսկողություն իրականացնելու համար»:
Սիմոնյանը հայտնեց, որ այս պահի դրությամբ ԱՄՆ-ն, ԵՄ-ն և Ֆրանսիան արդեն իսկ հասցեական հայտարարություն են արել. «Մեր ունեցած տեղեկություններով՝ ՌԴ-ն պատրաստվում է նմանատիպ հայտարարություն անել, որին հայ ժողովուրդն իր դաշնակից երկրից վաղուց է սպասում: Հուսանք՝ այս անգամ հուսախաբ չեն անի մեր գործընկերները»,- ասաց նա:
Հետևեք մեզ Viber-ում
