Դիարբեքիրի հայերը չեն կարողացել մտնել Սուրբ Կիրակոս եկեղեցի
Նախօրեին՝ Սուրբ Մարիամ Աստվածածնի վերափոխման տոնին Դիարբեքիրի հայ համայնքը չի կարողացել մտնել տեղի Սուրբ Կիրակոս հայկական եկեղեցին և նշել տոնը, գրում է demokrathaber.org կայքը: Լրատվամիջոցների փոխանցմամբ՝ չնայած հայերի պահանջին՝ տեղի իշխանությունները չեն հանել տարածք մտնելու արգելքն ու չեն բացել եկեղեցու դռները: Հիշեցնենք, որ թուրք-քրդական բախումների կիզակետում գտնվող Սուր պատմական թաղամասի Սուրբ Կիրակոս եկեղեցին ավերածության էր ենթարկվել, այնուհետև պետականացվել: Թեև տեղի հայ համայնքի ջանքերով եկեղեցին հաջողվեց վերադարձնել հիմնադրամին և կանխել Սուրբ Կիրակոսի ամբողջական ավերումը, եկեղեցին վերաբացելն ու տարածք մտնելը մինչ օրս խոչընդոտվում է իշխանությունների կողմից: «Մենք ցանկացանք գնալ մեր եկեղեցին, այնտեղ նշել տոնը, սակայն նահանգապետարանը թույլ չտվեց: «Անվտանգության երաշխիք չկա» ասացին: Մենք գիտենք, որ սա դիտավորյալ են անում, թույլ չեն տալիս, որ մենք մեր ավանդույթները կյանքի կոչենք», - ասել է Դիարբեքիրի հայ համայնքի ներկայացուցիչներից Փարամազ Մերջանը: Նշվում է, որ քաղաքի հայությունը նախօրեին պատարագն անցկացրել է քիչ հեռու գտնվող ասորական Սուրբ Մարիամ Աստվածածին եկեղեցում:
Հետևեք մեզ Viber-ում
