«Համբարձում Մաթեւոսյանը նույնիսկ չէր համարձակվում մտնել մեր շենք»․ Լենուղու վթարային շենքի բնակիչները հոգնել են խոստումներից

«Առավոտ» թերթը գրում է․ «Արմավիրի մարզի Լենուղի համայնքի 4-րդ կարգի վթարային1-ին եւ 3-րդ շենքերը դեռ 1988 թվականից ճանաչվել են վթարային, ու տարիների ընթացքում շենքային պայմաններն է՛լ ավելի են վատթարացել։ Այստեղ մարդիկ են ապրում, նրանց կյանքը վտանգված է, բնակիչներն ասում են՝ ամեն րոպե փլուզման վտանգ կա։

Խնդրի մասին բնակիչները երկար տարիներ է՝ բարձրաձայնում են, է՛լ բողոքի ցույցեր, է՛լ նամակներ ու պաշտոնյաների հետ հանդիպումներ։ Խոստումներից այն կողմ գործն առաջ չի գնում։ Բանն այն է, որ 2015 թվականին մի շենքի յուրաքանչյուր ընտանիքին կառավարությունը 6.6 մլն դրամ փոխհատուցում է տրամադրել։ Հիմա մնացել է 22 ընտանիք, սակայն նրանց փոխհատուցման խնդիրը ո՛չ հեղափոխությունից առաջ էր լուծվում, ոչ էլ՝ հետո։

Բնակիչները կրկին դիմեցին «Առավոտ»-ի խմբագրություն, հույսով, որ խնդրին մեկ անգամ եւս անդրադառնալուց հետո պետական կառույցներից գուցե արձագանք լինի։

Մեզ հետ զրույցում բնակիչներից Մկրտիչ Սահակյանն ասում է՝ հեղափոխությունից հետո տարբեր պաշտոնյաներ խոստացել են խնդիրը լուծել՝ հենց գումար լինի։ Ասում է՝ բոլորը՝ համայնքապետից մինչեւ մարզպետ նույն բանն են ասել՝ առաջնային, հրատապ ծրագրերի մեջ է շենքը, որպեսզի խնդիրը լուծենք։ Մկրտիչը զարմանում է՝ միթե 22 ընտանիքի համար, որտեղ անչափահաս երեխաներ կան, պետական բյուջեւում գումար չի գտնվում. «էսօր ամեն ինչի համար գումար կա, մարդկային կյանքի համար չկա»։

«Գյուղի բնակիչները սովխոզկոլխոզ ժամանակներից են այստեղ, կոլխոզի աշխատողների համար տներ են սարքել, բաժանել, մեր շենքը մնացել էր վերջում։ Էն էլ հերթ չհասավ։ Էս շենքը 1932 թվականի շենք է։ Ախր ոչ մի պայման չկա, բացի էն, որ վթարային է, կոմունալ պայմաններ էլ չկան, սանհանգույց չկա, ջուր չկա, 21-րդ դարում ի՞նչ ապրելու ձեւ է սա։ Մենք մեր կյանքից բան չենք հասկանում»,-ասում է Մկրտիչը, որը չորս անչափահաս երեխաների հայր է։

Փոխվարչապետ Համբարձում Մաթեւոսյանը, երբ Արմավիրի մարզպետն էր, այցելել էր տարածք, անձամբ տեսել վթարային շենքերը, եւ ինչպես բնակիչներն են ասում, Մաթեւոսյանը նույնիսկ չէր համարձակվում շենք մտնել, բնակիչներին էլ հորդորել էր՝ «շատով չբարձրանաք վերեւի հարկ, վտանգավոր է»։ Նա բնակիչներին այն ժամանակ խոստովանել էր՝ «հիմա իմ ձեռքին բան չկա, կառավարությունը պիտի գումար հատկացնի, որ ես էլ հարցը լուծեմ»։

«Մեզ խոստացել էին, որ ամեն եռամսյակը մեկ փոխհատուցումներ կտան, ու էդպես էլ չտվեցին։ Մաթեւոսյանը հիմա փոխվարչապետ է, հիմա նրա ձեռքին ահագին բան կա, ուզենա՝ խնդիրը կլուծի»,-ասում են բնակիչներն ու նեղսրտած ավելացնում՝ փոխվարչապետ դարձավ, մոռացավ։

Առջեւում ձմեռ է, շուտով անձրեւները կսկսվեն, ամեն անձրեւին բնակարանները անձրեւաջրերով են լցվում, խոնավանում, ինչի հետեւանքով երեխաները հիվանդանում են, բնակարաններում ձմռանը սաստիկ ցուրտ է լինում։

«Հետաքրիր է՝ մարդկային կյանքն իրենց համար նշանակություն չունի՞։ Հա, ողջունելի է, մանկապարտեզ ու դպրոց են սարքում, ասֆալտ ու ջրագիծ են քաշում։ Լավ է, բայց էսօր իմ համայնքում մանկապարտեզ եք սարքել, ես ունեմ չորս անչափահաս երեխա, եթե իմ էրեխու կյանքն ամեն րոպե վտանգված է, էդ մանկապարտեզն ինձ պե՞տք է։ էս շենքը շուտով կփլուզվի, զոհեր կլինեն ու իրենք կփնտրեն մեղավորներին, մեկը մյուսի վրա կգցի պատասխանատվությունը, մեկին էլ կդատեն ու կասեն՝ պատժեցինք մեղավորին»,-ասում է Մկրտիչը։

Ասում է՝ 2015-ին 6.6 մլն դրամ փոխհատուցումով մարդիկ կարողանում էին գոնե երեք սենյականոց տուն կառուցել, հիմա գները բարձրացել են, բայց վթարայինի բնակիչներն ավել բան չեն ուզում, իրենց հասանելիք գումարը տան, որպեսզի մարդիկ տուն կառուցեն, դուրս գան վտանգավոր տարածքից։

Դեռ 2019-ի նոյեմբերին Համբարձում Մաթեւոսյանը որպես մարզպետ ասուլիսում այս շենքերի մասին ասել էր. «Բնակիչների հետ հանդիպման ժամանակ որոշում կայացվեց, որ մարզպետարանն իրենց աջակցի հողատարածքներ ձեռք բերելու եւ տրամադրելու ուղղությամբ: Ներկայումս մարզպետարանում տարվում են աշխատանքներ հողի կատեգորիան փոփոխելու ուղղությամբ, որ տարբեր ընտանիքներին հենց համայնքում հողատարածքներ տրամադրենք: Շենքի շատ բնակիչներ արդեն իսկ ունեցել են հողհատկացումներ, կամ այս տարիներին ունեցել են հնարավորություն դուրս գալու: Բայց մենք փորձում ենք ցանկացած աջակցությամբ, գործիքակազմով իրենց աջակցել»:

Այս խոստումից անցել է երեք տարի, ու բնակիչները դեռ վթարային շենքում են բնակվում, լրատվամիջոցներն բազմիցս լուսաբանել են խնդիրը, սակայն այս 22 ընտանիքների ճակատագիրը, ըստ էության, կառավարությանը չի հետաքրքրում։ Աստված չանի, մի «Սուրմալու-2» էլ այս շենքը դառնա՞, որ բյուջեից գումար հատկացնեն, այն էլ ընդամենը 145 մլն դրամ։

Բնակիչներն արդեն հուսահատ քայլերի են պատրաստ դիմել, ասում են՝ կամ կմտնեն դպրոցի շենք ու կտնավորվեն կամ կհրաժարվեն քաղաքացիությունից։

Բայց մինչ այդ, այսօր կառավարության շենքի մոտ բողոքի ցույց են անելու, պաշտոնյաների արձագանքից հետո էլ կորոշեն իրենց հետագա քայլերը»։

Մանրամասները՝ թերթի այսօրվա համարում։