Պուտինի երևանյան օրակարգի նրբերանգները

Նիկոլ Փաշինյանը և Վլադիմիր Պուտինը երեկ երեկոյան կայացած հեռախոսազրույցում քննարկել են նոյեմբերի 23-ին Երևանում կայանալիք ՀԱՊԿ երկրների ղեկավարների գագաթաժողովին, ինչպես նաև դրա շրջանակում ՌԴ նախագահի՝ Հայաստան կատարելիք այցի օրակարգին վերաբերող հարցեր:

Վարչապետի աշխատակազմի փոխանցմամբ՝ մտքեր են փոխանակվել նաև հոկտեմբերի 31-ին Սոչիում կայացած եռակողմ հանդիպումից հետո տեղի ունեցած մի շարք իրադարձությունների, ինչպես նաև հումանիտար հարցերի շուրջ ձեռք բերված պայմանավորվածությունների կատարման ընթացքի վերաբերյալ:

Կրեմլը ևս հաղորդագրություն է տարածել հեռախոսազրույցի մասին, որում, սակայն, նշված է միայն ՀԱՊԿ երկրների ղեկավարների գագաթաժողովի մասին: Պուտինի այցի վերաբերյալ տեղեկություն առայժմ չի տարածվել:

ՀԱՊԿ Հավաքական անվտանգության խորհրդի նիստը, որի ընթացքում դաշինքի անդամ երկրների ղեկավարները կքննարկեն Հայաստանին տրամադրվող օգնությունը, նախատեսված է նոյեմբերի 23-ին՝ Երևանում, դեռ օրեր առաջ հրապարակվեց կառույցի պաշտոնական կայքէջում զետեղված հաղորդագրությունում։

ՀԱՊԿ գլխավոր քարտուղար Ստանիսլավ Զասը նիստի նախապատրաստական աշխատանքների մասին տեղեկացրել է դաշինքի անդամ Բելառուսի նախագահին՝ Մինսկում կայացած հանդիպմանը։ «Ստանիսլավ Զասը Ալեքսանդր Լուկաշենկոյին տեղեկացրել է նոյեմբերի 23-ին Երևանում կայանալիք ՀԱՊԿ Հավաքական անվտանգության խորհրդի հերթական նստաշրջանի նախապատրաստման, ինչպես նաև Հավաքական անվտանգության խորհրդի մի շարք անհատական հանձնարարականների կատարման մասին», - հայտնում էր ՀԱՊԿ մամուլի ծառայությունը։

Պուտինի այցը Երևան պետք է որոշակի արդյունքներ ապահովի: Դա ընդ որում ոչ միայն Հայաստանին ինչ-որ բան ապացուցելու, այլև ՀԱՊԿ կառույցի անդամներին ևս որոշ ուղերձներ հասցնելու հրամայական պետք է ունենա:

Ռուսաստանին հիմա համարում են նախկին խորհրդային մի հանրապետության դեմ պատերազմող, իսկ դաշնակիցներից մեկի հանդեպ «արդար» չվարվող երկիր:

Անկախ նրանից, թե Ռուսաստանի իշխանական քարոզչություն ապահովող մեդիայի ներկայացուցիչներն ու պալատական փորձագետներն ինչպես են մեկնաբանում, միևնույն է, Ռուսաստանը դեմքը փրկելու խնդիր ունի և Կրեմլում վստահաբար դա գիտակցում են:
Այս տեսանկյունից, Պուտինի հնարավոր այցը Երևան մի կողմից կվկայի այն մասին, որ Ռուսաստանը շարունակելու է Հարավային Կովկասում մնալ որպես ազդեցիկ երկիր և Մոսկվան Հայաստան-Ադրբեջան խնդրում հիմնական որոշողն է:

Իհարկե, Ռուսաստանն այս փուլում ձգտում է փոքր-ինչ շահել Հայաստանի սիրտը:
Այսօր Երևանում տեղի է ունեցել ՀՀ ԱԺ տարածաշրջանային և եվրասիական ինտեգրման հարցերի մշտական հանձնաժողովի և ՌԴ Պետդումայի ԱՊՀ հարցերի, եվրասիական ինտեգրման և հայրենակիցների հետ կապերի կոմիտեի համատեղ նիստը։ Նիստից հետո ՌԴ Դաշնային ժողովի Պետական դումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կազբեկ Տայսաեևը հայտարարել է, որ իրենք չեն պատկերացնում Ռուսաստանն առանց Հայաստանի, Հայաստանն՝ առանց Ռուսաստանի. «ՀՀ խորհրդարանականների հետ այսօր քննարկեցինք ու ձևակերպեցինք հարցեր, որոնք կօգնեն լուծել ինչպես Վերին Լարսում առկա խնդիրների, այնպես էլ տնտեսական որոշ հարցեր»։

Իհարկե, հայ-ռուսական օրակարգում կուտակվել են նաև բարդ հարցեր: Ռուսաստանի մի շարք գործիչների մուտքը Հայաստան, փաստորեն, արգելափակված է: Սա Ռուսաստանին նյարդայնացնող խնդիր է, բայց այս կերպ էլ Փաշինյանը ձգտում է պատասխանել ՌԴ-ում Հայաստանի իշխանության դեմ արդեն գրեթե 4 տարի տևող հակաքարոզչությանը:

Պուտինի երևանյան օրակարգն, այսպիսով, խոստանում է խիստ ուշագրավ դառնալ...

Մետաքսյա Շալունց