Մեր պետության անունից բանակցում է ԱԳ գործակալ նախարարը․ նա այդ լուրը չի հերքել․ Օրբելյան (video)

«Երկրորդ Հայաստանի Հանրապետություն, որպես միջազգային իրավունքի սուբյեկտ, գոյություն չի ունեցել, գոյություն է ունեցել մեկ միջազգային սուբյեկտ՝ Խորհրդային Միություն: Հայաստանը 1991-ին անկախանալով ինքնին չի համարվում Խորհրդային Հայաստանի իրավահաջորդ, Ադրբեջանը եւս չի կարող համարվել Խորհրդային Ադրբեջանի իրավահաջորդն, բոլորը համարվել են ԽՍՀՄ իրավահաջորդն: Այստեղ հարց է առաջանում, իսկ ո՞վ որոշեց, որ 15 հոգով պետք է անկախանանք, այլ ոչ 16, 17, 18 կամ 19:»,-«Հայաստանի իրական օրակարգ» թեմայով քննարկման ժամանակ նշեց փաստաբան Արամ Օրբելյանը:

Օրբելյանը նաեւ նկատեց, որ պատերազմը չի ավարտվել. «Մենք ունեցել ենք երկու հրադադարի փաստաթուղթ՝ 1994-ի մայիսին եւ 2020-ի նոյեմբերին. «Հրադադարն ունի իրավական ռեժիմ, բայց դա չի նշանակում սահման: Հայտարարվեց, որ ԵՄ դիտորդները գնացել են հայ-ադրբեջանական սահմանի հայկական կողմը, այսինքն արդեն սահմանը հրապարակային դիսկուրսներում դարձել է Ջերմուկի մատույցները: Այստեղ կարեւոր է շփման գիծ եւ սահման եզրույթների տարբերությունը»,-ընդգծեց նա:

Փաստաբանը նկատեց, որ եթե Հայաստանն ու Ադրբեջանը ճանաչեցին միմյանց տարածքային ամբողջականությունը եւ այդ թեման փակվեց, այլեւս չի բացվելու. «Եթե ուշադիր եք, ոչ ոք չի խոսում այսօր Նախիջեւանի մասին, դա քննարկման առարկա չէ: Արեւմտյան Հայաստանի մասին բացի Բեւեռից ոչ ոք չի խոսում»: