Հայկ Մարությանը հայտնվել է ՊՎԾ–ի թիրախու՞մ (video)

Երեւանի քաղաքապետարանում ՊՎԾ ուսումնասիրության արդյունքներով 14 քրեական գործ է հարուցվել։ Այս մասին այսօր՝ նոյեմբերի 2-ին, լրագրողների հետ զրույցում ասաց ՊՎԾ պետ Ռոմանոս Պետրոսյանը։

Նա նշեց, որ հարուցված քրեական գործերը հիմնականում վերաբերում են պետբյուջեից դոտացիաների տրամադրմանը, գույքահարկին, հողի հարկին, սեփական եկամուտների հաշվով սխալ հաշվարկներին, եկամուտների չգանձմանը։

Հարցին՝ արդյո՞ք Երեւանի նախկին քաղաքապետ Հայկ Մարությանը հրավիրվել է հարցաքննության, Պետրոսյանն ասաց.

«Ընթացակարգային առումով քաղաքապետարանի իքս վարչության առաջին կարգի մասնագետից սկսած մինչեւ գերատեսչության ղեկավար կարող են ընթացակարգային առումով այդ գործընթացներում ներգրաված լինել՝ յուրաքանչյուրն իր լիազորությունների շրջանակում։ Չեմ կարող կանխորոշել՝ որ գործով ով կարող է կանչվել հարցաքննության։ Այն երեւույթները, որոնք տեղի են ունեցել 2011 թվականից ի վեր մինչեւ մեր օրեր, ՊՎԾ մեկուկես տասնյակ հոգուց բաղկացած խումբ է, որտեղ ներգրաված են եւ տնտեսագետներ, եւ ֆինանսիստներ, եւ իրավաբաններ, որոնք հավուր պատշաճի ուսումնասիրել եւ փոխանցել են իրավապահներին»։

Հարցին՝ արդյո՞ք Հայկ Մարությանն անցնում է քրեական վարույթով, Պետրոսյանը չցանկացավ պատասխանել. «Դա այլեւս իրավապահների դաշտում է»։

Հարցին՝ ինչո՞ւ է ՊՎԾ-ն Հայկ Մարությանի պաշտոնավարման ավարտից հետո քաղաքապետարանում ուսումնասիրություններ սկսել, Ռոմանոս Պետրոսյանն ասաց. «Այս պահին ՊՎԾ-ն պետական կառավարման համակարգի մարմիններում իրականացնում է շուրջ 8 տասնյակ վերահսկողական գործընթացներ։ Որեւէ մեկի նկատմամբ խտրական մոտեցում ես բացառում եմ։ Երեւանի քաղաքապետարանում իրականացված ուսումնասիրությունը եւ շարունակվող մշտադիտարկումների համար դեռեւս հիմք են հանդիսացել 2020 թվականի սեպտեմբերին՝ վարչապետի հանձնարարականը՝ կապված տնտեսավարողներից եւ քաղաքացիներից վարչապետի աշխատակազմ ստացված մեծաթիվ նամակ-բողոքներից, որ քաղաքաշինության ոլորտում առկա են բավականին խտրական գործընթացներ, առերեւույթ որոշակի խախտումների մասին էին քաղաքացիները բարձրաձայնել։ Իմ նշանակումից դեռեւս առաջ փաստաթղթավորված էին լայնամասշտաբ ուսումնասիրություններ անելու այդ գործընթացները»։