ՔՊ-ականը պատասխանատվությունը գցեց Արսեն Թորոսյանի վրա (video)

ԵԽԽՎ-ում տեղի ունեցած վերջին միջադեպը պայմանավորված էր նրանով, որ նիստը ի պաշտոնե վարում էր Թուրքիայի պատվիրակության ղեկավարը, ով սկսած Հունաստանին վերաբերող հարցից, իրեն փորձում էր պահել ոչ թե որպես ԵԽԽՎ տվյալ նստաշրջանի տվյալ նիստը նախագահող, այլ որպես թուրքական պատվիրակության ղեկավար, ինչը չէր կարող չհանգեցնել միջադեպի։ Այս մասին, այսօր՝ հոկտեմբերի 18-ին, ԱԺ-ում լրագրողների հետ զրույցում նշեց ԱԺ ՔՊ խմբակցության պատգամավոր, պետաիրավական հանձնաժողովի նախագահ Վլադիմիր Վարդանյանը՝ անդրադառնալով Հայ Մամիջանյանի ելույթն ընդհատելուն ու հայկական պատվիրակության միջամտությանը։

Վերջինս ընդգծեց, որ Հայաստանի պավիրակությունը հստակ արձագանք է տվել միջադեպին. «Իմ կարծիքով ԵԽԽՎ-ի թե՛ քարտուղարությունը և թե՛ նախագահությունը հասկացել են միջադեպի պատճառները։ Ես քարտուղարությանը հայտնել եմ իմ տեսակետ, որ եթե դուք գիտեք, տեսնում եք գրանցված անձանց անունները , տեսնում եք, որ կարող են քննարկվել հարցեր, որոնք վերաբերում են X եւ Y պետություններին, ապա պետք է առնվազն առավել չեզոք ու հեղինակավոր մարդ նախագահի, որպեսզի նման կարիքներ չառաջանան: Ես նախատեսում եմ, որ երբ լինի ԵԽԽՎ-ի ընթացակարգի եւ ինստիտուցիոնալ հարցերի հանձնաժողովի նիստ, այդ հարցը կբարձրացնեմ:

Պարզ էր թուրքերի և ադրբեջանցիների դժգոհությունները, այս անգամ նրանք մնացել էին լիակատար մեկուսացման մեջ: Հայկական շահերը պաշտպանվելու են միջազգային հարթակներում՝ անկախ նրանից, թե զեկուցողը մեզ համար հաճելի, թե ոչ այնքան հաճելի բաներ է ասում: Որևէ մեկը որևէ միջազգային ատյանում հնարավորություն չպետք է ունենա ընդհատել ՀՀ ներկայացուցչի ելույթը»,- ասաց Վարդանյանը։

Հարցին՝ ավելորդ մարդասիրական քայլ չէ՞ր արդյոք իշխող խմբակցության պատգամավոր Արսեն Թորոսյանի ցավակցական գրառումը Թուրքիային, որտեղ նշված էր, որ տարածաշրջանի ժողովուրդները սգում են ծանր կորուստը, Վլադիմիր Վարդանյանը ասաց․ «Մարդը իրավունք ունի արտահայտել իր դիրքորոշումը, մարդասիրությունը երբեք ավելորդ չի լինում, դա քրիստոնեական արժեքների մաս է կազմում։ Շատ դեպքեր են լինում, որոնց պետք է արձագանքնել, այո ես էլ եմ շատ բաների համար ցավում: Որոշ բաների արձագանքում եմ, որոշ բաներ գերադասում եմ չասել։ Մնացած հարցերով դիմեք Արսեն Թորոսյանին, որովհետև դա իր անձնական կարծիքն է եղել»։