Մազերը փունջ-փունջ պոկած են՝ 15 տարի կեղծամով է եղել...

Արմավիրի մարզպետի խորհրդականի սպանության մեջ մեղադրվող կինը՝ Ռուզաննա Մ.-ն առողջական բազմաթիվ խնդիրներ ունի: Այս մասին այսօր՝ օգոստոսի 7-ին, NEWS.am-ի հետ զրույցում ասաց իրավապաշտպան Զարուհի Հովհաննիսյանը: Նա նշեց, որ այցելել է «Աբովյան» ՔԿՀ-ում գտնվող Ռուզաննային, որը եղել է հոգեբանական ծանր վիճակում: Նա զրուցել է կնոջ հետը, որը դեպքի վերաբերյալ մանրամասներ է պատմել, որոնք այժմ հրապարակման ենթակա չեն: «Ես այդ կնոջ հետ խոսել եմ, նա բազմաթիվ անգամ փորձ է արել հեռանալ ամուսնուց, սակայն, չի ստացվել: Ունի բազմաթիվ առողջական խնդիրներ: Նրա ֆիզիկական վիճակը տեսնելով՝ միանգամից հասկանալի է, որ բռնության է ենթարկվել: Երրորդ կարգի հաշմանդամ է՝ տարբեր տիպի մարմնական վնասվածքներով: Նրա մազերը փունջ-փունջ պոկած են՝ 15 տարի նա կեղծամով է ման եկել եւ այս ամենից կարելի է հանգստ եզրակացնել, թե ինչ է կատարվել նրա հետ»,-ասաց նա: Ավելի վաղ NEWS.am-ը հայտնել էր, որ Մանուկ Սիմոնյանի սպանության մեջ կասկածվում է նրա կինը: Նախնական տեղեկություններով սպանության դրդապատճառն ընտանիքում անհաշտ հարաբերություններն են եղել: