Կզսպեն ագրեսորին. Ռուսական ռազմաբազա ունեցող երկրի հանդեպ թուրք-ադրբեջանական տանդեմն ինչ ուզի՝ չպետք է անի

Սեպտեմբերի 13-ին հայկական կողմի նախաձեռնությամբ ՀԱՊԿ-ում ՀՀ մշտական և լիազոր ներկայացուցիչ Վիկտոր Բիյագովի նախագահությամբ կայացել է ՀԱՊԿ Մշտական խորհրդի արտահերթ նիստը, որին մասնակցում էին ՀԱՊԿ Գլխավոր քարտուղարի տեղակալ Վալերի Սեմերիկովը և ՀԱՊԿ Միացյալ շտաբի պետ Անատոլի Սիդորովը։

Նիստի ժամանակ ՀՀ ներկայացուցիչը ՀԱՊԿ ՄԽ անդամներին է ներկայացրել տեղեկատվություն այն մասին, որ սեպտեմբերի 13-ին՝ կեսգիշերից հետո Ադրբեջանի զինված ուժերը, կոպտորեն խախտելով միջազգային իրավունքը և հրադադարի ռեժիմը, սադրիչ և ագրեսիվ գործողություններ են իրականացրել Հայաստանի ինքնիշխան տարածքի նկատմամբ՝ որոշ ուղղություններում դիրքային առաջխաղացման փորձեր իրականացնելով։ ՀՀ զինված ուժերը բերվել են բարձր մակարդակի ռազմական պատրաստության և անցել իրենց վստահված հատվածների պաշտպանությանը։ Ադրբեջանական զինված ուժերի գործողությունները համարվում են ՀԱՊԿ անդամ պետություն հանդիսացող Հայաստանի տարածքային ամբողջականության և ինքնիշխանության կոպիտ խախտում, իսկ իրավիճակը կարող է հանգեցնել լայնամասշտաբ զինված հակամարտության:

Վիկտոր Բիյագովը նշել է, որ Հայաստանը, դիմելով ՀԱՊԿ-ում իր դաշնակիցներին, ակնկալում է նրանցից գործուն հավաքական քայլեր Հայաստանի Հանրապետության անվտանգության, տարածքային ամբողջականության և ինքնիշխանության ապահովման համար՝ ՀԱՊԿ կանոնադրության շրջանակներում։ Նա վստահություն է հայտնել, որ ՀԱՊԿ մեխանիզմներն ի վիճակի են զսպել ագրեսորին։

Բոլորի համար պարզ է, որ Ռուսաստանի ծանր դրության պայմաններում Էրդողանն ու Ալիևը որոշել են, որ Փաշինյանի իշխանության պայմաններում կարող են ստանալ ավելին, քան կարող էին երազել: Նրանք մի վիճակում են հայտնվել, որ թե բանակցություններով, թե պատերազմով կարող են և սպառնալ, և ստանալ ավելին:

Իսկ ժամանակ, նրանք ըստ ամենայնի, այնքան էլ չունեն, ու շտապում են՝ «լուծել» հարցեր՝ արդեն պոկել Հայաստանից, որքան հնարավոր է:

Մոսկվան, թեև հրապարակավ չի հակադրվի թուրք-ադրբեջանական տանդեմին, բայց երկրորդ կապիտուլյացիա չի կարող թույլ տալ: Դա կնշանակի ռուսական ռազմաբազա ունեցող երկրի հանդեպ թուրք-ադրբեջանական տանդեմն ինչ ուզում՝ անում է: Սա արդեն աններելի կլինի ռուսական ռազմաքաղաքական էլիտայի համար:

Մյուս կողմից Ֆրանսիայի նախագահն էլ պատրաստվում է ՄԱԿ-ի Անվտանգության խորհրդի նիստ հրավիրել Հայաստանի և Ադրբեջանի միջև բախումների հարցով, հաղորդում է Ելիսեյան պալատը։

«Ֆրանսիան հարցը կտանի ՄԱԿ Անվտանգության խորհուրդ, որտեղ այս պահին նախագահում է», հայտարարել է նախագահ Մակրոնի գրասենյակը։ «Նախագահ Մակրոնը շարունակում է հորդորել պահպանել հրադադարը և հարգել Հայաստանի տարածքային ամբողջականությունը»,-հայտարարել է նախագահական գրասենյակը, հավելելով՝ Մակրոնը պատրաստակամ է նաև բանակցել Ադրբեջանի առաջնորդ Իլհամ Ալիևի հետ։ Անվտանգության խորհրդի նիստ հրավիրելու ժամկետներ և այլ մանրամասներ դեռ չեն հաղորդվել։

Հիշեցնենք, որ Փաշինյանը նաև հայտնել է, որ 1997 թվականի «Բարեկամության փոխօգնության մասին» պայմանագրի հիման վրա դիմել են Ռուսաստանին և որոշում են կայացրել դիմել նաև ՄԱԿ-ի Անվտանգության խորհրդին՝ իրավիճակը հրատապության կարգով քննարկելու համար։

Մետաքսյա Շալունց