Փաշինյանի ժեստը՝ Պուտինին. Թուրքիայի հետ հարաբերությունները՝ Մոսկվայի միջոցով

Նիկոլ Փաշինյանը սեպտեմբերի 6-9-ն աշխատանքային այցով Ռուսաստանի Դաշնությունում է: Նա Վլադիվոստոկում մասնակցում է «Բազմաբևեռ աշխարհի ճանապարհին» թեմայով Արևելյան տնտեսական 7-րդ համաժողովի լիագումար նստաշրջանին, որն ընթանում է Ռուսաստանի նախագահ Վլադիմիր Պուտինի և այլ պետությունների ղեկավարների մասնակցությամբ:

Նախատեսված Փաշինյանի և Պուտինի հանդիպումը:

Սեպտեմբերի 5-ին աշխատանքային այցով Մոսկվայում գտնվող ՀՀ ԱԳ նախարար Արարատ Միրզոյանը հանդիպել էր ՌԴ ԱԳ նախարար Սերգեյ Լավրովի հետ: Նրանք քննարկել էին ՌԴ նախագահի՝ Հայաստան նախատեսված պետական այցի ու Երևանում կայանալիք ՀԱՊԿ Հավաքական անվտանգության խորհրդի նստաշրջանի կազմակերպման ընթացքը։

Այսպիսով, հայ-ռուսական օրակարգում է Պուտինի՝ հայաստանյան այցի հարցը:
Ո՞ր դեպքում Պուտինը կգա Հայաստան... Այն դեպքում, եթե ռուսական հովանում ներքո հայ-ադրբեջանական և հայ-թուրքական բանակցություններում ռուսական կողմի սպասումները բավարարվեն:

Ահա, այսօր արդեն Փաշինյանն առաջին ժեստն է արել այդ ուղղությամբ...
«Հայաստանը հույս ունի, որ Թուրքիայի հետ հարաբերությունները հնարավոր կլինի կարգավորել Մոսկվայի օժանդակությամբ», - այսօր Վլադիվոստոկում մեկնարկած Արևելյան տնտեսական համաժողովի ընթացքում հայտարարել է Հայաստանի վարչապետ Նիկոլ Փաշինյանը։

«Թուրքիայի հետ երկխոսությունն արդեն մեկնարկել է։ Մենք հույս ունենք Ռուսաստանի օգնությամբ կարգավորել հարաբերությունները», - ասել է Փաշինյանն՝ անդրադառնալով նաև հայ-ադրբեջանական հարաբերություններին։

«Ադրբեջանի հետ ինտենսիվ խոսակցություն է ընթանում Լեռնային Ղարաբաղի հակամարտության առթիվ։ Մենք հույս ունենք, որ Ռուսաստանը, ոչ միայն որպես մեր ռազմավարական դաշնակից, այլև Ադրբեջանի շատ մոտ գործընկեր, կօժանդակի այդ հարցում։ Ադրբեջանի համար դա ևս հնարավորություններ է ստեղծում», - հայտարարել է Փաշինյանը։

Ի դեպ, իր հերթին Ռուսաստանի նախագահի մամուլի խոսնակն էլ հիշեցրել է աշխարհին, որ Թուրքիան «բարեկամ երկիր» է:

Պուտինի խոսնակ Դմիտրի Պեսկովը «Իզվեստիա» թերթին տված հարցազրույցի ընթացքում խոսել է ռուս-թուրքական հարաբերությունների մասին: «Անկասկած, Թուրքիան մեզ համար բարեկամ երկիր է։ Թուրքիան մեզ համար շատ կարևոր գործընկեր է թե՛ քաղաքական և թե՛ առևտրատնտեսական համագործակցության առումով։ Մենք գիտենք, որ Թուրքիան չի միացել հակառուսական ապօրինի պատժամիջոցներին, Թուրքիան իրականում վարում է ինքնիշխան, անկախ արտաքին քաղաքականություն»,- ըստ Ermenihaber.am-ի նշել է Պեսկովը:

Ըստ նրա` երկու երկրների համագործակցության ներուժը հսկայական է և դեռ ամբողջությամբ չի օգտագործվել: Միաժամանակ Պեսկովը շեշտել է, որ Ռուսաստանի ու Թուրքիայի միջև կան տարաձայնություններ մի շարք հարցերի շուրջ, ինչպես օրինակ՝ Ուկրաինայի հարցում:

Անդրադառնալով Ռուսաստանի և Ուկրաինայի նախագահների միջև բանակցություններ կազմակերպելու Թուրքիայի փորձերին, Պեսկովն նշել է. «Ինչ վերաբերում է Պուտինի և Զելենսկու հանդիպմանը, ապա այս հարցում ոչինչ չի փոխվել։ Մեզ պետք չէ հանդիպում միայն հանդիպման համար»։

Մետաքսյա Շալունց

Միացե՛ք ՀԱՅԵԼԻ Ակումբին Telegram-ում. https://t.me/HAYELI_am