Գյուլը դուրս մնաց

Թուրքական Son dakika լրատվական կայքի փոխանցմամբ՝ Թուրքիայի իշխող «Արդարություն ու զարգացում» կուսակցության (ԱԶԿ) կայքում հրապարակվել է կուսակցության հիմնադիրների նոր ցուցակը, որում նրանց թիվը 64-ից նվազել է 61-ի։ Մասնավորապես, այդ ցուցակից դուրս են մնացել Թուրքիայի 11-րդ նախագահ Աբդուլահ Գյուլը և ԱԶԿ-ից Թուրքիայի առաջին արտգործնախարար Յաշար Յաքըշը։ Հիշեցնենք, որ վերջին շրջանում Աբդուլահ Գյուլը հանդիպումներ է ունեցել Թուրքիայի 12-րդ նախագահ Ռեջեփ Էրդողանից դժգոհ նախկին պատգամավորների ու նախարարների հետ, ինչպես նաև հայտարարել էր, թե Թուրքիան ապրում է հանրապետության ամենաբարդ օրերից մեկը՝ կապված Անկարայի ահաբեկչության ու հարավ-արևելքում արյունալի ռազմական գործողությունների հետ։ Ինչ վերաբերում է Թուրքիայի նախկին (2002 թվականի նոյեմբեր – 2003 թվականի մարտ) արտգործնախարար Յաշար Յաքըշին, ապա նա օրեր առաջ հայտարարել էր, որ Սիրիայում ռազմական միջամտություն իրականացնելու դեպքում Թուրքիան կարող է կորցնել Հաթայը։ Ի դեպ, 2015 թվականի ապրիլի վերջին Գյուլն իր հարցազրույցներից մեկում հայտարարել է, որ հենց ինքն է ԱԶԿ-ի հիմնադիրը. «ԱԶԿ-ի հիմնական հիմնադիրը ես եմ: ԱԶԿ-ի կողմից առաջ քաշված թե՛ առաջին վարչապետը, թե՛ առաջին նախագահը եղել եմ ես: Հետո ինչ, որ նախագահության ավարտից հետո չեմ զբաղեցնում որևէ պաշտոն: Ընկերներիս հաջողությունից բացի որևէ այլ բան չեմ ցանկանում»: Աբդուլահ Գյուլը Թուրքիայի վարչապետ է հանդիսացել 18.11.2002-14.03.2003 ժամանակահատվածում, 14.03.2003-28.08.2007 ժամանակահատվածում նա եղել է Թուրքիայի արտգործնախարարը և գրեթե միաժամանակ (28.03.2003-28.08.2007)՝ փոխվարչապետ, իսկ 28.08.2007-28.08.2014 ժամանակահատվածում Գյուլը եղել է Թուրքիայի նախագահը: