Նոր մանրամասներ`Դինքի սպանության գործից

Ստամբուլի հայկական «Ակօս» թերթի փոխանցմամբ՝ պարզվել է, որ «Ակօս» թերթի նախկին խմբագրապետ Հրանտ Դինքի սպանությունից 4 ամիս առաջ Տրապիզոնի ժանդարմերիայի հետախուզությունը հետևել է նրան Ստամբուլում գտնվող իր տան մոտակայքում։ Դատախազության և դատարանի հայտարարություններից հստակ է, որ Դինքի սպանվելու մասին Յասին Հայալի ազգական Ջոշքուն Իղջին 2006 թվականի ամռանը տեղեկացրել է Տրապիզոնի ժանդարմերիայի հետախուզության բաժնին։ «Ալ- Ջազիրա»-յի լրագրող Սելահաթին Գյունդայը հաղորդում է, որ Տրապիզոնի ժանդարմերիայի հետախուզության 4 աշխատակից սպանությունից 4 ամիս առաջ՝ 2006 թվականի օգոստոսի 8-11-ը, գտնվել են Ստամբուլում։ Տեղեկության համաձայն՝ ուսումնասիրության են առնվել Տրապիզոնի ժանդարմերիայի աշխատակիցների հեռախոսազրույցները (բջջային հեռախոս)։ Ուսումնասիրության արդունքում հայտնի է դարձել, որ Տրապիզոնի ժանդարմերիայի 4 աշխատակցի բջջային հեռախոսները օգոստոսի 8-11-ի ընթացքում ազդանշան են արձակել Ստամբուլի Բաքըրգյուղից թաղամասից։ Այս բացահայտումից հետո ուսումնասիրության է առնվել նաև Հրանտ Դինքին պատկանող բջջային հեռախոսի ձայնագրությունները։ Այս ուսումնասիրությունից հետո հայտնի է դարձել, որ այդ նույն օրերին Հրանտ Դինքի հեռախոսն ազդանշան է արձակել Բաքըրգյուղի նույն հասցեից։ Դինքի հեռախոսի ազդանշան արձակած վայրը մոտ է այն տանը, որտեղ Դինք ընտանիքն է բնակվում։ Այս փաստը ներառվել է զեկույցի մեջ։ Հեռախոսային ազդանշանների ուսումնասիրության արդյունքում բացահայտվել է նաև այն, որ Դինքի սպանության օրը ժանդարմերիայի 5 ներկայացուցիչ եղել է սպանության վայրում։