ԻՊ-ի հրապարակած տեսանյութում երևացել են նաև ադրբեջանցի ահաբեկիչներ

«Իսլամական պետություն» ահաբեկչական խմբավորումը (ԻՊ) հուլիսի 30-ին Ռաքքայում նկարահանված 30 րոպե տևողությամբ տեսանյութ է հրապարակել, որտեղ, ինչպես նշվում է երևում են նաև ադրբեջանցիներ: Այս մասին հայտնում է ադրբեջանական cebhe.info-ն: Middle East Media Research Institute մոնիտորինգային ծառայությունը մանրակրկիտ ուսումնասիրության է ենթարկել տեսանյութը, ինչի արդյունքում ի հայտ են եկել հետաքրքիր փաստեր: Տեսանյութը նկարահանված է արհեստավարժ մակարդակով և հիմնականում հանդես է գալիս ԻՊ-ի գլխավոր քարոզիչ համարվող Մուհամմադ Ալ-Ադնանին, նրա խոսքն ուղեկցվում է Ռաքքայում տեղի ունեցած ռազմական գործողությունները ներկայացնող տեսանյութերով, որոնցում երևում են նաև ԻՊ-ին պատկանող զենքերն ու զինտեխնիկան: Տեսանյութում ԻՊ ահաբեկիչները ցուցադրաբար մահապատժի են ենթարկում մի մարդու, ով իբր կասկածվում է «Իսլամի թշնամիների» հետ համագործակցության մեջ, այդպիսով փորձելով վախեցնել Ռաքքայի բնակչությանը: Կադրերում երևում երկու ադրբեջանցի, որոնք պայթեցնում են Ռաքքա մուտք գործող քրդերի դիրքերը: