Ողբերգական դեպք Արարատի մարզում. հայտնաբերվել է 16-ամյա երեխայի դի

Այսօր՝ հուլիսի 30-ին, ողբերգական դեպք է տեղի ունցել Արարատի մարզում: Ժամը 08:00-ի սահմաններում Արտակարգ իրավիճակների նախարարության փրկարար ծառայության և Ոստիկանության Երևան քաղաքի վարչության օպերատիվ կառավարման կենտրոններ ահազանգ է ստացվել, որ Այգեզարդ գյուղի «Կարմիր սար» կոչվող տարածքում երեխայի դի կա: Ինչպես հայտնում է ֆոտոլրագրող Գագիկ Շամշյանը, նշված գյուղ են մեկնել Ոստիկանության Արարատի մարզային վարչության օպերատիվ խումբը՝ մարզի ոստիկանապետ Սևան Քոչարյանի և Ոստիկանության Արտաշատի բաժնի օպերատիվ խումբը՝ Արտաշատի ոստիկանապետ Արթուր Հավհաննիսյանի գլխավորությամբ: Ժամանել են նաև ԱԻՆ ՓԾ Արտաշատ հրշեջ-փրկարարական ջոկատը՝ Արարատի մարզային փրկարարական վարչության պետ Մուրադ Մարգարյանի գլխավորությամբ: Ոստիկաններն ու փրկարարները նշված վայրում՝ էլեկտրասյունից մոտ 20 մետր հեռավորության վրա հայտնաբերել են Արարատի մարզի Շահումյան գյուղի բնակիչ 16-ամյա Գեղամ Հովհաննիսյանի դին: Դատաբժշկի նախնական եզրակացության համաձայն, երեխան մահացել է հոսանքահարման հետևանքով: Տեղում քննչական աշխատանքները ղեկավարում է Հայաստանի քննչական կոմիտեի Արարատի մարզային քննչական վարչության հատկապես կարևոր գործերով ավագ քննիչ Գրիշա Ղազարյանը, ում կողմից փաստի առթիվ հարուցվել է քրեական գործ և նշանակվել են մի շարք փորձաքննություններ: Գ. Շամշյանի տեղեկություններով՝ մահացած Գ. Հովհաննիսյանը իր համագյուղացի 2 հասակակից ընկերների հետ եկել էին Այգեզարդ գյուղ: Եվ ընկերների ներկայությամբ նա ցուցադրական բարձրացել է 10 հազար վոլտ լարմամբ էլեկտրասյան վրա, ինչն էլ ավարտվել է ողբերգությամբ: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: