Գերմանիայի նախագահը Զելենսկուց բացատրություն է պահանջել

Գերմանիայի նախագահ Ֆրանկ-Վալտեր Շտայնմայերը Ուկրաինայի նախագահ Վլադիմիր Զելենսկու հետ հեռախոսազրույցում խնդրել է բացատրել, թե ինչու է ապրիլին չեղարկվել Կիեւ իր այցը։ Կողմերը քննարկել են նաեւ Շտայնմայերի հնարավոր այցը ապագայում, սակայն ամսաթիվը դեռ որոշված չէ։ Այս մասին հայտնել է գերմանական Der Spiegel թերթը՝ հղում անելով աղբյուրներին։

Հրատարակության տվյալներով՝ Գերմանիայի եւ Ուկրաինայի նախագահների զրույցը տեղի է ունեցել մայիսի 5-ին եւ տեւել է 45 րոպե։ Զրույցի ընթացքում ուկրաինական կողմն առաջարկել է Ֆրանկ-Վալտեր Շտայնմայերի այցը կազմակերպել մայիսի 8-ին, սակայն նա հրաժարվել է այն պատճառով, որ Բունդեսթագի նախագահ Բերբել Բասի այցն արդեն նախատեսված է եղել այդ օրը։

Der Spiegel-ը հայտնում է, որ Ուկրաինան Ֆրանկ-Վալտեր Շտայնմայերի ապրիլի 12-ի այցը չեղարկել է նյութատեխնիկական խնդիրների եւ անվտանգության ապահովման դժվարության նկատառումներից ելնելով։