Քյարամյանը բիսեդկի ջահելի տպավորություն է թողել. Զոհված զինծառայողների ծնողները պահանջում են քրեական գործը ՔԿ-ից տեղափոխել ԱԱԾ (video)

Արցախյան երրորդ՝ 44-օրյա պատերազմում զոհված զինծառայողների ծնողները ՀՀ գլխավոր դատախազության շենքի մոտ են՝ պարզելու, թե դատախազն ինչ որոշում է կայացրել՝ քրեական գործն ԱԱԾ տեղափոխելու պահանջի վերաբերյալ։ Զոհված զինծառայող Էդգար Զաքարյանի հայրը՝ Սևակ Զաքարյանը, լրագրողների հետ զրույցում ասաց, որ ավելի քան մեկ ամիս է, ինչ քրեական գործը ՔԿ-ում է, բայց առ այս պահը որևէ առաջընթաց չկա։

«Ինչպես տվել ենք՝ այդպես էլ մնացել է։ Շարժ չկա։ Քյարամյանի հետ հանդիպման ժամանակ ասաց՝ կկանչենք, կհարցաքննենք, բայց ոչինչ չկա, փափուկ բարձ դրեց մեր գլխի տակ՝ կծանոթանանք նյութերին, բայց ի՞նչ կար այդտեղ ծանոթանալու, բայց մինչև այսօր ոչ մի պատասխան չկա։ Քյարամյանը բիսեդկի ջահելի տպավորություն թողեց, դրա համար չենք վստահում, թող քրեական գործը տեղափոխվի ԱԱԾ»,-նշեց Զաքարյանը՝ հավելելով, որ, եթե ինքն իմանար, որ իր որդին զոհվել է հանուն հայրենիքի՝ կհասկանար, կլռեր, բայց երբ գիտի, որ իր որդուն դավաճանել են, խփել թիկունքից՝ լռել չի կարող։

Անդրադառնալով Քյարամյանին իշխանությունների կողմից գեներալ-մայորի կոչում շնորհելուն՝ Զաքարյանը նշեց. «Դե եթե կամակատար է, ոնց թելադրում են, այնպես էլ՝ շարժվում է, բնական է՝ գեներալ էլ կտան, վաղը մյուս օրը՝ ֆելդմարշալ էլ կտան։ Տականքի թելադրանքով է շարժվում, դրա համար էլ չենք վստահում այդ կառույցին»։

Զաքարյանը նշեց, որ նոր գլխավոր դատախազին դեռևս չեն ճանաչում, բայց, քանի որ Արթուր Դավթյանն առաջին օրվանից հայտարարեց, որ իրենց պահանջն արդար է, պահանջում են, որ արդար պահանջը մինչև վերջ տանեն։

«Կապված չէ՝ նոր դատախազի գալ-չգալու հետ, ուղղակի քանի դեռ գործընթացը շարունակվում է, չենք վստահում, թող տեղափոխեն ԱԱԾ»,- նշեց Զաքարյանը։