Եկամտահարկով բնակարաններ և անհասկանալի արտահանում

Տնտեսական ակտիվության աճն հիմնականում ապահովվում է շինարարության հաշվին։ Հրապարակված պաշտոնական տվյալները փաստում են, որ այս ոլորտում աճը 5 ամսվա տվյալներով կազմել է ավելի քան է 11 տոկոս։ Բայց այն հիմնված է հիմնականում բնակարանային շինարարության վրա, ինչն էլ իր հրթին ուղիղ կապ ունի եկամտային հարկի վերադարձի արտոնության հետ։ Եթե չլիներ այդ արտոնությունը, վստահաբար զարգացման նման տեպմ չէինք ունենա։
Ի դեպ՝ եկամտահարկի վերադարձի օրենքը ընդունվել է նախկին իշխանության օրոք և հաջողությամբ գործում է առ այսօր։ Նախկինների հասցեին ուղղված տարատեսակ մեղադրանքների շարքում՝ Փաշինյանը կարող է նաև այս կետը ներառել։ Օրինակ՝ կարող է հայտարարել, որ նախկինների ընդունած օրենքի պատճառով կառավարությունը պատրաստվում է այս տարի հարկատուների փողերից շուրջ 30 մլրդ դրամ վճարել եկամտային հարկի վերադարձի համար, որպեսզի վճարունակ քաղաքացիները նոր բնակարան ձեռք բերեն։
Իսկ իրականությունն այն է, որ եկամտահարկի վերադարձը շինարարության, հատկապես բնակարանաշինության ոլորտում ընդգծված ծավալներ է ապահովում ւ փաստացի դարձել է տնտեսության իրական հատվածի լոկոմոտիվը։ Ի դեպ՝ քաղաքացին եկամտային հարկի արտոնությունից կարող է օգտվել ընադամենը մեկ անգամ՝ ստանալով առավելագույնը 55 մլն դրամի չափով վարկ։
Բայց, շինարարությունից բացի, տնտեսության իրական հատվածում այլ նկատելի տեղաշարժեր չկան։
Ներքին առևտրում 5 ամսում գրանցվել է 8,9 տոկոս աճ, որն արտահայտվել է առաջին հերթին մեծածախ առևտրում։ Մանրածախում ակտիվություն կա, բայց շատ քիչ։ Գների ու եկամուտների աճի անհամապատասխանությունը չի նպաստում մանրածախ առևտրի ակտիվությանը։ Ամեն դեպքում՝ շինարարությունից հետո սա երկրորդ առավել ակտիվ ճյուղն է։
Հինգ ամսում տնտեսական ակտիվությունը կազմել է 10,2 տոկոս՝ չհաշված գյուղատնտեսությունը, որի ցուցանիշները դեռ հրապարկված չեն։
Առաջին եռամսյակում գյուղատնտեսությունն անկումային էր, իսկ երկրորդ եռամսյակի ցուցանիշը կհրապարակվի հաջորդ ամիս՝ սեզոնային գործոնով պայմանավորված աճի ցուցանիշով։
Արդյունաբերության 5 ամսվա աճն ընդամենը 2,7 տոկոս է, կազմել որտեղ զգալի է նաև որոշ ապրանքների միջազգային բարձր գների ազդեցությունը։
Պաշտոնական վիճակագրության մեջ ամենազարմանալին արտահանման աճն է, որը հինգ ամսվա տվյալներով կազմել է 25,7 տոկոս։ Սա իսկապես անհավանական ցուցանիշ է, եթե հաշվի առնենք լոգիստիիկ դժվարությունները, որոնց մասին մշտապես բարձրաձայնում են տնտեսվարողները։
Հայկ Դավթյան