Չեմ պատրաստվում ներողություն խնդրել, առավել ևս ինչ-որ գումար վճարել

Երեւանի քաղաքապետարանի ավագանու նախկին անդամ Մարինա Խաչատրյանը, ըստ դատարանի որոշման, ներողություն պետք է խնդրի ԱԺ «Քաղաքացիական պայմանագիր» կուսակցության պատգամավոր Արսեն Թորոսյանից, ապա որպես փոխհատուցում վճարի 100 հազար դրամ:

Հիշեցնենք, որ 2019թ. օգոստոսին Մարինա Խաչատրյանը ֆեյսբուքյան էջում մի քանի հրապարակում էր արել՝ ՀՀ առողջապահության նախկին նախարար Արսեն Թորոսյանի վերաբերյալ։ Թորոսյանը հայց էր ներկայացրել ընդհանուր իրավասության դատարան, որն ընդունվել էր վարույթ եւ քննվում էր դատավոր Ռուբեն Բունիաթյանի վարույթում։ «Դատալեքս» դատական-տեղեկատվական համակարգից տեղեկանում ենք` Մարինա Խաչատրյանը հայցի դեմ առարկություններ էր ներկայացրել, սակայն 2022 թվականի մայիսի 18-ին կայացված վճռով դատարանը պարտավորեցրել է նրան ներողություն խնդրել ԱԺ պատգամավորից և որպես փոխահատուցում՝ վճարել 100,000 դրամ:

Մարինա Խաչատրյանը մեզ հետ զրույցում նշեց, որ այս վճիռը բոլորովին չի նշանակում, թե Արսեն Թորոսյանը դատը շահել է. «Արսեն Թորոսյանը դատը չի շահել, ես այդպես չեմ համարում, նա երեք կետով դատարան էր դիմել, նախ ինձանից պահանջում էր մի քանի միլիոն դրամ` որպես փոխհատուցում, ապա ներողություն, սակայն դատարանը որոշեց, որ պետք է վճարեմ ընդամենը 100 հազար դրամ, ապա ներողություն խնդրեմ, սակայն ես որևէ մեկից չեմ պատրաստվում ներողություն խնդրել, առավել ևս ինչ-որ գումար վճարել: Այս վճիռը ևս բողոքարկել եմ, որովհետև համոզված եմ, որ ես փաստեր ներկայացնելուց զատ ոչինչ չեմ արել: Այդ փաստերը ներկայացրել եմ թե առաջին ատյանի դատարան, թե վերաքննիչ: Հույս ունեմ, որ Վերաքննիչ դատարանն իմ դիմումը կբավարարի և այս կետերը ևս դատարանը չի բավարարի: Ես խոսել եմ հանցագործության մասին, անգամ հանցագործության մասին հաղորդում էի ներկայացրել: Անգամ ԱԱԾ-ն բացահայտել է, որ իրավախախտում է տեղի ունեցել» - նշում է Մարինա Խաչատրյանը:
 

 «Հրապարակ օրաթերթ»