Ով է «մեղք». պարզում են «Սասնա ծռերն» ու պաշտպանները

2016թ. ոստիկանության ՊՊԾ գունդը գրաված «Սասնա ծռեր» զինված խմբի անդամներից 18-ի գործով դատական նիստն այսօր վերսկսվելուն պես դատավոր Արտուշ Գաբրիելյանը հայտարարեց, որ ամբաստանյալների պաշտպանների՝ իր դեմ ներկայացրած ինքնաբացարկի միջնորդությունը մերժվում է: Այնուհետեւ դատավորն ընդառաջեց պաշտպաններից Հարություն Բաղդասարյանի խնդրանքին եւ ամբաստանյալներին դատարան բերել տվեց ոչ թե մեկ -մեկ, այլ բոլորին միանգամից: Իրավունքներն ու պարտականությունները ներկայացնելուց հետո դատավորն ամբաստանյալներից հետաքրքրվեց՝ իր դեմ բացարկի միջնորդություն ունե՞ն: Ամբաստանյալներն էլ դրական պատասխան տվեցին: Այնուհետև Սերգեյ Կյուրեղյանը պահանջեց իր պաշտպան Մուշեղ Շուշանյանին, որին ի պատասխան դատավորն ասաց, որ նա իր սեփական կամքով չի ներկայացել: Հիշեցնենք, որ Շուշանյանը քանի նիստ է՝ ներկա չէ, քանի որ, ըստ իր պնդման, դատարանի կարգադրիչներն իրեն ոչ թե զննում են, այլ խուզարկում: «Ամբաստանյալներին բերում ենք, բայց նրանք հետեւություններ չեն անում ու դատավորի գալուն պես ոտքի չեն կանգնում: Կիրառում եմ բոլորի հանդեպ սանկցիա՝ նախազգուշացում: Պարոն Լիպարիտ Սիմոնյան, չորս նիստ է՝ չեք գալիս, հետո էլ ասում եք, թե ամբաստանյալներին տանում-բերում ենք անընդհատ էս շոգին, մեղք չե՞ն»,-հայտարարեց դատավոր Արտուշ Գաբրիելյանը: Մարտիրոս Հակոբյանը՝ «Դեդը», տեղից արձագանքեց. «Մենք մեղք չենք, դուք եք մեղք»: