Անժելա Թովմասյանին կանչել են ԱԱԾ եւ բացատրություն պահանջել․ քրգործի համար հիմքեր են պատրաստում
Այսօր տեղեկատվություն էինք հաղորդել, որ «Հայելի» ակումբի ղեկավար Անժելա Թովմասյանի դեմ քրեական գործ են պատրաստվում հարուցել՝ «ազգային արժանապատվությունը հրապարակայնորեն նվաստացնելուն ուղղված գործողություններ կատարելու առթիվ, ՔՐ օրենսգրքի 226 հոդվածի, երկրորդ մասի առաջին կետով, այն է՝ «Անձի կամ անձանց խմբի նկատմամբ սեռով, ռասայով, մաշկի գույնով, էթնիկական կամ սոցիալական ծագումով, գենետիկական հատկանիշներով, լեզվով, կրոնով, աշխարհայացքով, քաղաքական կամ այլ հայացքներով, ազգային փոքրամասնությանը պատկանելությամբ, գույքային վիճակով, ծնունդով, հաշմանդամությամբ, տարիքով կամ անձնական կամ սոցիալական բնույթի այլ հանգամանքներով պայմանավորված բռնություն գործադրելու հրապարակային կոչերը, նման բռնությունը հրապարակայնորեն արդարացնելը կամ քարոզելը․․․․», որը պատժվում է տուգանքով՝ նվազագույն աշխատավարձի հիսնապատիկից հարյուրհիսնապատիկի չափով, կամ կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը մեկ տարի ժամկետով:
Մեզ հետ զրույցում Անժելա Թովմասյանն ասաց․ «Ես քիչ առաջ մամուլից իմացա, որ պատրաստվում են գործ հարուցել։ Սա կարելի էր կանխատեսել, որովհետև մոտ 10 օր առաջ Արմեն Գրիգորյանի գործով ինձ ծանուցում էր եկել, որպես վկա հրավիրել էին ԱԱԾ։ Ես ներկայացա ու զրույցից մոտ 5-10 րոպե հետո հասկացա, որ իրականում ինձ այնտեղ հրավիրելը այդքան էլ կապ չունի Գրիգորյանի գործի հետ։ Այդ ընթացքում մեկ այլ ձայնագրություն միացրին, իսկ նրանց տված հարցերն այնպիսին էին, որ կռահեցի՝ իրականում խնդիրը իմ անձի հետ է կապված, թիրախում հենց ես եմ, սա շատ հստակ էր ինձ համար»։
«Շատ տարօրինակ ու զավեշտալի գործ էր։ Ես հիմա շատ չմանրամասնեմ, միայն կասեմ, որ փաստաբանս ինձ հուշել էր, որ հարցերին հնարավորինս քիչ պատասխանեմ։ Ինձ այդ ժամանակ զգուշացրին նաև, որ ես վկայից կարող եմ կասկածյալ դառնալ։ Նրանք փորձում էին այնպես անել, որ ես անպայման մեկնաբանեմ, սակայն ես միայն ասացի, որ դա իմ կողմից եղել է զուտ մի փոքր պատմական ակնարկ։ Եկեք սպասենք, տեսնենք՝ իրենք ինչ կանեն, դրանից հետո թե ես, թե փաստաբանս մանրամասն կանդրադառնանք։ Զավեշտն այն է, որ ուզում են ապացուցել, թե ես ինչ-որ մեկի արժանապատվությունն եմ վիրավորել, բայց պարզ չէ, թե ում։ Գործի ծիծաղելիությունը էլ ավելի ակնհայտ կդառնա, երբ որ սկսեն քննել գործը»,- ասաց Թովմասյանը։
Խմբագրի պնդմամբ՝ ինքն իշխանությունների թիրախում արդեն երկու ամիս է, ինչ հայտնվել է։ «Իմ անձի նկատմամբ տարբեր կողմերից ես ճնշումներ եմ նկատում։ Ի դեպ, գովազդների առումով ինձ ևս փորձում են ճնշել, իսկ տարբեր հարթակներում իմ նկատմամբ ճնշումների մասին, կարծում եմ, բոլորն են տեղյակ։ Գիշերը ուշ ժամին տևական ժամանակ առաջ մոտեցել էին մեր բնակարանին ու զանգը հնչեցնելով՝ հայտնել, թե ԱԱԾ-ից են։
«Հայելի» ակումբի վրա ուղիղ հարձակման մասին նույնպես չպետք է մոռանանք՝ ձվերով հարվածների մասին է խոսքը, որից հետո այդ գործը պարզապես ծածկադմբոց արեցին ու մեղավորները՝ «Հեղափոխության պահապանները», այդպես էլ պատասխանատվության չենթարկվեցին։ Ամեն ինչ շատ պարզ է ինձ համար։ Փորձում են վախեցնել ինձ, սպառնալ։ Սակայն ես վստահեցնում եմ իրենց, որ սա անպատասխան չի մնալու, շատ տխուր ու ծանր վիճակում են շատերը հայտնվելու։ Ինքը խմբագիր է, իրականում շատ լավ հասկանում է՝ ինչի մասին եմ խոսում։ Ինձ համար անհասկանալի է ԱԱԾ-ի պահվածքը։ Երկիրը հանձնվում է, մենք սարսափելի վտանգների մեջ ենք, իսկ իրենք չգիտես՝ ինչով են զբաղված»,- հավելեց նա:
Հետևեք մեզ Viber-ում
