Պուտինի ուժգին մուտքը Հարավային Կովկաս

Ռուսաստանը, որը ԵՄ-ի ու ԱՄՆ-ի հետ սրված հարաբերությունների պայմաններում շարունակում է կոշտ քաղաքականություն ցուցադրել` չի սահմանափակվում միայն այս «ճակատում» իր մասին հիշեցնելով ու ազդեցության հետ հաշվի նստելու պահանջ ներկայացնելով: Հուլիսի 30-ին Վրաստանում կմեկնարկեն ՆԱՏՕ-ի զորավարժությունները, որոնց նաև Հայաստանն է մասնակցում: Զորավարժությունների անցկացման փաստն, ինչպես երևում է, նյարդայնացնում է Մոսկվային, որը պատասխան քայլերի է դիմում: Մոսկվայի քաղաքականությունն առաջիկայում ևս, ինչպես երևում է, մեր տարածաշրջանում մնալու է որպես ուժի և ազդեցության դիրքերից հանդես եկողի քաղաքականություն: Օրերս Վրաստանի նախագահ Մարգվելաշվիլին նշել է, որ ռուսական սողացող ագրեսիային միջազգային հանրության արձագանքը մնում է անբավարար: Նախօրեին կայացած ճեպազրույցում Գիորգի Մարգվելաշվիլիի տեսակետը ներկայացրել է նրա մամուլի խոսնակ Էկա Միշվելաձեն, անդրադառնալով օկուպացիոն գոտում քաղաքացիական անձանց կամավոր պարեկության հարցին: Մարգվելաշվիլին զգուշացրել է, որ մյուս կողմում գտնվող ուժը մշտապես սադրանքների է դիմում, վերջին շրջանում ակտիվացել են շփման գծի արգելափակոցները Վրաստանի տարածք խորացնելու գործողությունները, և դա կատարվել է զորավարժությունների ֆոնին, որ Ռուսաստանը անցկացնում է Վրաստանի օկուպացված տարածքներում: Հարավային Օսիայում Ռուսաստանը մեծ զորավարժություն է սկսել՝ ներգրավելով շուրջ 16 հազար զինծառայողների և 4 հազար միավոր զենք-զինտեխնիկա: Վրաստանի կառավարությունը այս զորավարժությունը համարում է 2008թ. օգոստոսի 12-ի համաձայնագրի ևս մեկ խախտում: Վրաստանի կառավարությունում հաշտեցման և քաղաքացիական հավասարության հարցերով պետնախարար Քեթևան Ցիխելաշվիլին լրագրողներին ասել է, որ նման մանևրները վտանգ ու սպառնալիք են ներկայացնում ոչ միայն Վրաստանի, այլև ամբողջ տարածաշրջանի և Եվրոպայի համար: Ավելի վաղ «Ռեզոնանս» թերթը գրել էր, որ Կարապիլա գյուղի մոտ Բաքու-Սուփսա նավթատարը հայտնվել է վարչական սահմանի մյուս կողմում: Վրաստանի ներկայիս իշխանությունները դրա համար մեղադրում են նախկին իշխանություններին: Պաշտպանության և անվտանգության հարցերով խորհրդարանական հանձնաժողովի նախագահ Իրակլի Սեսիաշվիլին «Ռեզոնանս»-ին ասել է, որ վարչական սահմանները որոշվել են նախկին իշխանությունների կողմից՝ անձամբ Միխեիլ Սաակաշվիլիի հրամանով: «Օկուպանտները հիմա այդ սահմանին արգելափակոցներ են դնում, և սահմանի մեջ է ընկում նաև նավթատարը, բայց կա նաև այլընտրանքային տարբերակ, որն ի սկզբանե մշակվել էր», - ասել է Սեսիաշվիլին՝ նշելով, որ դա մեծ սպառնալիք չէ: «Ամենամեծ սպառնալիքն այն է, որ մեր տարածքը օկուպացված է և այնտեղ ռազմակայաններ են տեղակայված», - նշել է Վրաստանի խորհրդարանի պաշտպանության և անվտանգության հարցերով հանձնաժողովի ղեկավարը: Նկատենք, որ օրերս տեղեկություններ ի հայտ եկան, ոչ ռուսական ուժերը հարավօսական Կարապիլա գյուղի մոտ «զավթել» են Բաքու-Սուփսա նավթատարի մի հատված։ «Ռեզոնանսին» նշել էր, որ այդ կերպ առաջ է հրվել Վրաստանի հետ Օսիայի սահմանը։ Փաստը հաստատվել էր Վրաստանի Պետանվտանգության ծառայությունը։ «Մենք շատ խիստ ենք գնահատում այդ փաստը, ինչպես և բոլոր նախորդները։ Մենք գործընկերների հետ աշխատում ենք այդ գործընթացը կանգնեցնելու ուղղությամբ։ Առաջին հերթին, դա սադրանք է, և շատ կարևոր է այդ գործողությունը միջազգային հանրության հետ դադարեցնելը»,-ասել է ԱԳ նախարար Միխայիլ Ջանելիձեն։ Մետաքսյա Շալունց