Ընդդեմ հայկական շահի՝ ռուսական մեդիայում. Ռուս-ադրբեջանական նոր գործարք

Ռուսաստանի արտգործնախարար Սերգեյ Լավրովը Բաքվում օրեր առաջ հայտարարեց, թե Ռուսաստանը գնահատում է Ադրբեջանի հետ հարաբերությունները և ակնկալում զարգացնել դաշնակցային համագործակցությունը։ «Աշխարհի իրավիճակը պահանջում է կարծիքների և գնահատականների, պայմանավորվածությունների մշտական փոխանակում, որոնք հաշվի են առնում կողմերի շահերը, ինչպես հարիր է դաշնակիցներին՝ փետրվարին ստորագրված դաշնակցային փոխգործակցության հռչակագրի լույսի ներքո»,- ասել է Լավրովը Ադրբեջանի արտգործնախարարի հետ կայացած մամուլի համատեղ ասուլիսում։

Ռուսաստանի արտաքին քաղաքական գերատեսչության ղեկավարը նշել է, որ իր համար «միշտ հաճելի է լինել Բաքվում, որը ծաղկում է բառի բուն իմաստով։ «Մենք գնահատում ենք մեր հարաբերությունները, միշտ հաճելի է համատեղել անձնական շփումները մեր համատեղ աշխատանքային խնդիրների քննարկումների հետ», - ընդգծել է Լավրովը։
Ռուս-ադրբեջանական սերտացման սա միակ դրսևորումը չէ: Այլ, ավելի առարկայական դաշտում Մոսկվան ու Բաքուն համագործակցության մակարդակի նոր «կամուրջներ» են գցել...

Այսպես, Բաքվում Լավրովը ուշագրավ համաձայնագիր է ստորագրել ադրբեջանական կողմի հետ, որն առնչվում է տեղեկատվական միասնական համագործակցությանը: Ռուսաստանն ու Ադրբեջանը պայմանավորվել են երկու երկրների մեդիա կառույցների միջև սերտ համագործակցության շուրջ։

Ի՞նչ է սա նշանակում...

Մոսկվան ու Բաքուն, այսուհետ ստանձնել են պարտավորվածություն պայքարել ընդդեմ անջատողական քաղաքականության, պաշտպանել երկրների տարածքային ամբողջականությունը: Այսինքն, տեղեկատվական դաշտում Ռուսաստանն ու Ադրբեջանը «հակաքարոզչական գործունեությանն» են պատրաստվում խոչընդոտել:

Ասել է թե՝ ռուսական լրատվամիջոցներում այսուհետ չեն կարող, օրինակ, հայտնվել հայանպաստ հարցազրույցներ, հոդվածներ, քանի որ դա չի բխի արդեն ստորագրված ռուս-ադրբեջանական համաձայնագրի շահերից, կհակասի այդ համաձայնագրի ոգուն և տառին:

Այսինքն, ըստ Ռուսաստան-Ադրբեջան միջպետական համաձայնագրի՝ ռուսական պետական քարոզչական միջոցները այսուհետ էլ ավելի սերտ համագործակցեն ադրբեջանական մեդիա կառույցների հետ, ավելին՝ կհամակարգեն իրեն գործունեությունը, որպեսզի թույլ չտան հայանպաստ դիրքորոշումների շրջանառում՝ ռուսական մեդիայում:

Մետաքսյա Շալունց