Վաշինգտոնից «ապտակեցին» Ալիևին. Պուտինը պետք է որոշում կայացնի սենսացիոն նորությունից հետո
Ադրբեջանի նախագահ Իլհամ Ալիևն ընդամենը մի քանի օր առաջ «խրոխտ» ձայնով հայտարարեց, թե ԵԱՀԿ Մինսկի խմբի հետագա գործունեությունը անհրաժեշտ չէ և ներկա պահին հրատապ է Ադրբեջանի և Հայաստանի միջև հարաբերությունների կարգավորումը, ու որպեսզի հիմնավորի ասածը, անգամ ասաց. «Մենք արդեն մեսիջ ենք ստացել, որ Մինսկի խմբի ինստիտուտն այլևս չի գործի»։
Երեկ, սակայն, շատ կարևոր հայտարարություն է հնչել ԵԱՀԿ Մինսկի խմբում համանախագահող ԱՄՆ-ի պաշտոնյայի կողմից: «Ազատությանը» տված բացառիկ հարցազրույցում ԱՄՆ պետքարտուղարի եվրոպական և եվրասիական հարցերով տեղակալ Քերըն Դոնֆրիդի մեկ հայտարարություն, կարելի է ասել՝ սառը ցնցուղի էֆեկտ կլինի Ալիևի համար:
Հիշեցնենք, որ Երևան ժամանելուց առաջ Պետքարտուղարության բարձրաստիճան պաշտոնյան հանդիպումներ էր ունեցել Վրաստանում ու Ադրբեջանում։
Ամերիկացի պաշտոնյան նշել է, որ ԱՄՆ-ը պատրաստ է շարունակել համագործակցությունը Մինսկի խմբում՝ հանուն ԼՂ խնդրի կարգավորման: Սա սենսացիոն հայտարարություն է, որովհետև մինչև վերջերս Մոսկվայից անընդմեջ հայտարարում էին, թե արևմուտքը արգելափակել է ԵԱՀԿ Մինսկի խումբը, ու այս վերջին ձևաչափում էլ Մոսկվայի հետ համագործակցության «թելերը» կտրվել են:
Ու հանկարծ, ամերիկացի պաշտոնյան Երևանում ոչ ավել, ոչ պակաս հայտարարում է, որ ԱՄՆ-ը պատրաստ է շարունակել համագործակցությունը Մինսկի խմբում՝ հանուն ԼՂ խնդրի կարգավորման:
Սա ավելին, քան «ապտակ» է Ալիևի համար, որը վերջին շաբաթներին հատկապես սկսել էր մեծ ինտենսիվությամբ «թաղել» ԵԱՀԿ Մինսկի խմբի ֆորմատը՝ ազդարարելով նրա վախճանի մասին, անգամ մի քանի անգամ հեգնեց, թե պետք է համանախագահությանը թոշակի ուղարկել...
Մյուս կողմից, Քերըն Դոնֆրիդի սենսացիոն նորությունը ուշագրավ է այնքանով, թե ինչպես դրան կարձագանքի Մոսկվան:
Որոշումը պետք է կայացնի Պուտինի՝ ինչպե՞ս արձագանքել: Եթե ՝ դրական է, նշանակում է ԱՄՆ-ն ու Ռուսաստանը գոնե մի ձևաչափում կարող են համագործակցություն վերականգնել, ինչը շատ կարևոր է, նախևառաջ Արցախի կարգավիճակի վերաբերյալ միասնական տեսակետ ձևավորելու առումով:
Մետաքսյա Շալունց
Հետևեք մեզ Viber-ում
