Ես անվանակոչում եմ ձեզ ցռան մոզի․ Պավլիկ Մանուկյանը՝ դատավորին
Երեւանի Ավան եւ Նոր Նորք վարչական շրջանների ընդհանուր իրավասության դատարանում, այսօր՝ հուլիսի 26-ին, «Սասնա ծռերի» դատական նիստի ժամանակ «Սասնա ծռերից» Պավլիկ Մանուկյանը դատավոր Արտուշ Գաբրիելյանին «ցռան մոզի» անվանեց: դատական նիստի ժամանակ վիճաբանություն տեղի ունեցավ խմբի անդամ Պավլիկ Մանուկյանի եւ դատավոր Արտուշ Գաբրիելյանի միջեւ: Պավլիկ Մանուկյանը ցանկանում էր հայտարարությամբ հանդես գալ, սակայն դատավորն արգելեց հայտարարելով, որ հիմա հայտարարությունների ժամ չէ, եւ Մանուկյանը կարող է խոսել միայն իր թույլտվությունից հետո, սակայն վերջինս, ի հեճուկս դատավորի հրահանգի, հայտարարեց, որ իր պաշտպաններին արգելում է ներկա գտնվել դատական նիստերին, եթե ինքն անձամբ չլինի դատարանում: Պավլիկ Մանուկյանը փորձում էր անընդհատ հայտարարություն անել, սակայն դատավորը թույլ չէր տալիս՝ նշելով, որ հայտարարություն անելու ժամանակ դեռ կգա։ Առանց դատարանի թույլտվության տեղից խոսելու համար դատավորը նախազգուշացրեց Մանուկյանին, ապա հեռացրեց դատական նիստերի դահլիճից։ «Ես սանկցիայից չեմ վախենում, պարոն դատավոր։ Ես մահվան երախից եմ դուրս եկել, ես ոչնչից չեմ վախենում։ Ես իմ պաշտպաններին արգելում եմ էստեղ ներկա գտնվել իմ բացակայության ընթացքում, եթե կգտնվեն, ապա կդիմեմ Փստաբանների պալատին բողոքով։ Եթե իմ նկատմամբ սանկցիա եք կիրառում, ես էստեղ դատարան չեմ տեսնում եւ անվանակոչում եմ ձեզ ցռան մոզի»։ Նշենք, որ այս գործը քննվում է Էրեբունի եւ Նուբարաշեն վարչական շրջանների ընդհանուր իրավասության դատարանի կողմից, սակայն նիստերն արտագնա անցկացվում են Ավան եւ Նոր Նորք վարչական շրջանների ընդհանուր իրավասության դատարանում:
Հետևեք մեզ Viber-ում
