Ռուբեն Մելքոնյանն ու Գագիկ Ղազինյանը բոյկոտել են․ վերջինս վարչապետի ելույթի ժամանակ լքել է դահլիճը

Օրերս վարչապետ Նիկոլ Փաշինյանը Ալ․ Սպենդիարյանի անվան օպերայի և բալետի ազգային ակադեմիական թատրոնում ներկա է գտնվել Երևանի պետական համալսարանի շրջանավարտների ավարտական միջոցառմանը: Ավանդույթի համաձայն ուսումնական տարվա վերջին տեղի ունեցող այս միջոցառմանը ներկա են լինում երկրի ղեկավարը՝ նախագահը կամ վարչապետը, ԵՊՀ խորհրդի նախագահը։ Այժմ այդ պաշտոնում Պաշտպանության նախարար Սուրեն Պապիյկյանն է, ով ևս ներկա է գտնվել միջոցառմանը։  

Վարչապետ Փաշինյանը ԵՊՀ մի շարք ներկայացուցիչների հանձնել է պարգևներ, ՀՀ վարչապետի շնորհակալագրով են խրախուսվել մի շարք համալսարանականներ, սակայն նախորդ տարիներին շրջանավարտներն են դիպլոմներ ստացել․  ինչ խոսք այս տարի, առավել քան երբևէ իշխանությունները իրենց առջև խնդիր էին դրել ապացուցելու, որ իրենք ԵՊՀ-ում որևէ խնդիր չունեն։ 

ԵՊՀ-ում կան այնպիսի դեկաններ, ամբիոնի վարիչներ, ովքեր իրենց ընդգծված վերաբերմունքն են ցույց տվել այսօրվա քաղաքական ուժի նկատմամբ, մասնավորապես Արևաելագիտական և իրավաբանական ֆակուլտետների դեկաններ Ռուբեն Մելքոնյանն ու Գագիկ Ղազինյանը։

Կան դեկաններ և ամբիոնի վարիչներ, ովքեր կուլիսներում խոսում են այսօրվա իշխանությունների բերած աղետի մասին, այնուամենայնիվ մասնակցել են վարչապետի նախաձեռնած միջոցառմանը, ավելի՝ որևէ քայլ չեն արել, երբ վարչապետն է բեմ բարձրացել, միայն Իրավաբանականի դեկան Գագիկ Ղազինյանը,այն պահին, երբ բեմ է բարձրացել վարչապետը, ցուցադրաբար դուրս է եկել դահլիճից։ Իսկ Ռուբեն Մելքոնյանը և իր ղեկավարած ֆակուլտետը ընդհանրապես չեն մասնակցել։

Մամուլում նաև տեղեկություններ եղան, որ ուսանողներին նախապես տեղյակ չեն պահել, որ նարկա  է լինելու վարչապետը, որպեսզի չբոյկոտեն և մասնակցեն միջոցառմանը։