Նիկոլ Փաշինյանի հետողորմյան․ միասնական պայքարի արդյունքը

Քրեական նոր օրենսգրքում, որն ուժի մեջ է մտնելու հուլիսի 1-ից, չի ներառվի ծանր վիրավորանքը քրեականացնելու մասին հոդվածը, որը գործում էր 2021 թվականի օգոստոսի 30-ից։ Այս ընթացքում ծանր վիրավորանքի տարբեր հատկանիշներով արդեն հարուցվել էր 802 քրեական գործ, որոնցից 6-ով կայացվել են մեղադրական դատավճիռներ։

Ըստ այդմ՝ նշված բոլոր գործերը պետք է կարճվեն, իսկ կայացված դատավճիռները՝ չեղարկվեն, դատապարտվածներն՝ արդարացվեն, կալանավորվածներն ազատ արձակվեն։
Ծանր վիրավորանքի հոդվածի ապաքրեականացման մասին գրառում էր կատարել արդարադատության նախարար Կարեն Անդրեասյանը։
<<Վարչապետի գլխավորությամբ կայացած միջգերատեսչական քննարկումների արդյունքներով նպատակահարմար չի համարվել ծանր վիրավորանքի ամրագրումը նոր Քրեական օրենսգրքում. այդ անընդունելի երևույթի համար կպահպանվի միայն քաղաքացիական պատասխանատվությունը` մինչև 3 մլն դրամի չափով։ Սույն թվականի հուլիսի 1-ից ուժի մեջ մտնող Քրեական օրենսգիրքը այլևս պատասխանատվություն չի նախատեսում ծանր վիրավորանքի համար: Ծանր վիրավորանքի համար քրեական պատասխանատվությունը նախատեսվել էր հասարակության խոր բևեռացման պայմաններում առանձին խմբերի և անհատների խայտառակ անընդունելի վարքագիծը զսպելու նպատակով:
Որքան էլ առանձին քաղաքական շրջանակներ հայտարարում էին ծանր վիրավորանքի քրեաիրավական նոր կարգավորման հակասահմանադրականության մասին, այդուհանդերձ, Սահմանադրական դատարանը հստակ արձանագրեց, որ այն լիովին համապատասխանում է Սահմանադրությանը:
Վարչապետի գլխավորությամբ կայացած մի շարք մասնագիտական քննարկումների արդյունքում կառավարությունը գտել է, որ հետագա ժողովրդավարացման մեր օրակարգում խոսքի ազատության նույնիսկ իրավաչափ սահմանափակումը պետք է հնարավորինս իրականացնել առանց քրեական հետապնդման գործիքակազմի: Գործադիրը նպատակահարմար չի գտել ծանր վիրավորանքի ամրագրումը նոր Քրեական օրենսգրքում` նախընտրելով այդ անթույլատրելի երևույթի համար արդեն իսկ գործող քաղաքացիական պատասխանատվության կարգավորումները:
Կառավարությունը շարունակելով խոսքի ազատության պաշտպանության իր հանձնառությունը` նախատեսում է նաև միջազգային լավագույն փորձը հաշվի առնող օրեսնդրական միջոցներ ձեռնարկել` պաշտպանելու նաև անձանց արժանապատվությունը, մասնավոր կյանքը, ազգային անվտանգությունը և այլ չափազանց կարևոր արժեքներ ազատ արտահայտման չարաշահումներից>>,- Ֆեյսբուքի իր էջում գրել էր Կարեն Անդրեասյանը:
Նա նաև հարկ է համարել հիշեցնել, թե ազատ խոսքը չարաշահողները պարտավոր կլինեն վճարել մինչև 3 մլն․ ՀՀ դրամ գումար:
Այնուամենայնիվ, ինչու իշխանությունները որոշեցին հետողորմյա անել և այդպես միանգամից հրաժարվել ծանր վիրավորանքի քրեականացման հոդվածից ։ Վստահաբար կարելի է ասել, որ սա առաջին հերթին ազատ խոսքի արժեքի համար պայքարող լրագրողական համայնքի, իրավունքի համար պայքարող և ազատ մտածող անհատների և կազմակերպությունների, ինչպես նաև քաղաքական ընդդիմության հետևողական պայքարի արդյունքն է։ Անշուշտ, իշխանությունը, որը հատկապես եվրոպական երկնրեից խոշոր վարկեր ստանալու լուրջ ակնկալիքներ ունի, ստիպված է եղել տուրք տալ նաև միջազգային կառույցների ճնշումներին՝ հրաժարվելով ծանր վիրավորանքի խայտառակ հոդվածից։
Ամեն դեպքում պայքարը դեռևս ավարտված չէ, այն պետք է շարունակվի, մինչև որ կվերանայվի նաև 3 մլն դրամ տուգանքի շեմը։

Հայկ Դավթյան