Կրեմլի գլխավոր հաղթաթուղթը. ամեն ինչ գնում է ըստ պլանի
Լրագրողների հետ հանդիպմանը ՌԴ նախագահի մամուլի քարտուղար Դմիտրի Պեսկովը մեկնաբանել է ԱՄՆ նախագահ Ջո Բայդենի հայտարարությունն այն մասին, թե պատժամիջոցների պայմաններում Եվրոպան կարող է նավթ գնել Ռուսաստանից, սակայն ավելի ցածր գնով։
«Իհարկե, Ռուսաստանը վնասով ոչինչ չի վաճառի։ Ամեն դեպքում, եթե ինչ-որ տեղ պահանջարկը կրճատվում է, մեկ այլ տեղ այն ավելանում է, տեղի է ունենում հոսքերի վերակողմնորոշում, առավել բարենպաստ պայմանների որոնում»,- հայատրարել է Պեսկովը։ «Սա տնտեսության հետ կապ ունեցող հարց է, փաստն այն է, որ լոգիստիկ խնդիրները շարունակվում են, ինչը հանգեցնում է համաշխարհային էներգետիկ շուկայի ապակայունացմանը։ Հետևաբար, ամեն դեպքում, ամեն ինչ կարգավորում է շուկան, անգամ չնայած այն արհեստական դժվարություններին, որոնք հրահրվում են պատժամիջոցներով»,- Պեսկովի խոսքերն է մեջբերել «Ինտերֆաքս»-ը։
Հիշեցնենք, որ նախորդ շաբաթ ԱՄՆ նախագահ Ջո Բայդենը հայտարարել է, թե Միացյալ Նահանգները դաշնակիցների հետ քննարկում են ռուսաստանյան նավթը շուկայականից ցածր գնով գնելու հնարավորությունը։ Նրա խոսքով՝ Վաշինգտոնը Եվրոպայում դաշնակիցների հետ միասին տարբերակներ է փնտրում վառելիքի գները զսպելու համար, որոնք աճում են ուկրաինական հակամարտության և Ռուսաստանի դեմ պատժամիջոցների ֆոնին։ Զսպող քայլերից մեկը ռուսական նավթի էժան գնով ձեռքբերումն է։ Վաշինգտոնը Եվրոպայում դաշնակիցների հետ միասին տարբերակներ է փնտրում վառելիքի գները զսպելու համար, որոնք աճում են ուկրաինական հակամարտության և Ռուսաստանի դեմ պատժամիջոցների ֆոնին։ Զսպող քայլերից մեկը, հատկապես այն եվրոպական երկրների համար, որոնք աշխարհագրական դիրքի պատճառով առավել մեծ կախում ունեն ռուսական էներգակիրներից, ըստ Բայդենի, ռուսական նավթի էժան գնով ձեռքբերումն է։
«Դուք ունեք խնդիր, որն ի հայտ է եկել հիմա, երբ Եվրոպան նախատեսում է էլ ավելի սահմանափակել ռուսաստանյան նավթի գնումները։ Ակտիվ մտորումներ են ընթանում, թե ինչ կարելի է անել՝ միգուցե, նույնիսկ գնել նավթը, բայց սահմանափակ գնով»,- ասել էր Բայդենը և հավելել, որ այդ դեպքում Ռուսաստանը կպահպանի նավթ արտահանելու հնարավորությունը, սակայն «զգալիորեն ցածր գնով, քան ներկայումս սահմանվել է շուկայում»։
Կրեմլը, սակայն, չի պատրաստվում ընդունել ոչ շահեկան առաջարկներ․ Մոսկվան թերևս վստահ է, որ որոշ ժամանակ անց Եվրոպան կհամաձայնվի գնել ռուսական նավթը շուկայական գնով։ Ռուս-ուկրաինական հակամարտությունը առաջին հերթին ֆինանսական և տնտեսական ռեսուրսների պատերազմ է․ ով ավելի երկար կդիմանա պատժամիջոցներին, նրա օգտին էլ կորոշվի պատերազմի ելքը։ Ռուսաստանի տնտեսության բացառիկությունը էներգետիկ ռեսուրսների և առաջին սպառման ապրանքների ինքնաբավությունն է, որն էլ կարող է դառնալ Կրեմլի գլխավոր հաղթաթուղթը։
Հայկ Դավթյան
Հետևեք մեզ Viber-ում
