Պուտինի մտերիմ, ՌԴ-ում Ադրբեջանի թիվ մեկ լոբբիստ՝ Գոդ Նիսանովը, Մարիա Զախարովան՝ ԱՄՆ-ի պատժամիջոցների նոր փաթեթում

ԱՄՆ-ը պատժամիջոցների տակ հայտնված անձանց նոր ցուցակ հրապարակեց

ԱՄՆ ֆինանսների նախարարությունը հրապարակել է պատժամիջոցների նոր ցուցակ, որում ներառված են 17 ռուսաստանցիներ և 16 ընկերություններ Ռուսաստանի Դաշնությունից։ Սահմանափակումները սառեցնում են ակտիվները, արգելում որևէ բիզնես վարել և գործարքներ կնքել այդ մարդկանց և ընկերությունների հետ։ Ցուցակում հայտնված անձանց արգելվում է նաև մուտք գործել Միացյալ Նահանգներ:

ԱՄՆ-ի նոր պատժամիջոցների ցուցակում ընդգրկված անձանց թվում են Ռուսաստանի արտգործնախարարության պաշտոնական ներկայացուցիչ Մարիա Զախարովան, տնտեսական զարգացման նախարար Մաքսիմ Ռեշետնիկովը, տրանսպորտի նախարար Վիտալի Սավելևը, թավջութակահար Սերգեյ Ռոլդուգինը, ով համարվում է Վլադիմիր Պուտինի մտերիմ ընկերը, գործարար Ալեքսեյ Մորդաշովը գրեթե ողջ ընտանիքի հետ:
Ի դեպ, Միացյալ Նահանգները պատժամիջոցներ են սահմանել նաև ռուսաստանցի ձեռնարկատեր Գոդ Նիսանովի նկատմամբ, ով համարվում է Ռուսաստանում Ադրբեջանի շահերի գլխավոր լոբբիստը:

Ռուսական հետախուզության ղեկավարը, ըստ “Проект”-ի հետաքննության, օգտվում է ադրբեջանցի միլիարդատիրոջ ակտիվից

Ով է Գոդ Նիսանովը, բացի՝ ՌԴ-ում Ադրբեջանի լոբբիստ լինելը... Ռուսաստանի արտաքին հետախուզության ծառայության ղեկավար Սերգեյ Նարիշկինը և նրա ընտանիքի անդամներն օգտվում են ադրբեջանցի միլիարդատեր Գոդ Նիսանովի ակտիվից, դեռ 2 տարի առաջ պարզել էր “Проект” հարթակը, որը հաճախ է նման լրագրողական հետաքննություններ անցկացնում, որոնց հիմնական հերոսները ռուսաստանցի բարձրաստիճան պաշտոնյաներ են, երկրի իշխանությունների ամենակարկառուն ներկայացուցիչները: Ինչպես հաղորդում էր «Ազատությունը», Նիսանովը Մոսկվայում «Եվրապեյսկի» առևտրի կենտրոնի և «Ուկրաինա» հյուրանոցի սեփականատերն է, համարվում է Ռուսաստանում ամենահաջողակ ռանտյեն՝ 2,7 մլրդ դոլար կարողությամբ:

Հետաքննության հեղինակները տեսագրությունում պատմել էին. «Լեռնային Ղարաբաղի համար պատերազմի թեժ պահին Ռուսաստանը չի օգնել Հայաստանին` իր ռազմական դաշնակցին։ Միլիարդատեր Գոդ Նիսանովի կապերն ու ընկերությունը Ռուսաստանի և Ադրբեջանի ղեկավարության հետ կարող են բացատրել Մոսկվայի նման որոշման պատճառը: Այդ կապերն այնքան սերտ են, որ հակամարտության թեժ պահին ռուսական հետախուզության ղեկավար Սերգեյ Նարիշկինը ժամանակ էր անցկացնում Նիսանովի անձնական լողավազանում Ադրբեջանի փոխվարչապետի ընտանիքի անդամի հետ»։ Նրանք պնդում են, որ Ռուսաստանի արտաքին հետախուզության ծառայության ղեկավարն ամեն օր լողում է Նիսանովի անձնական լողավազանում` «Եվրապեյսկի» առևտրի կենտրոնում: Բացի այդ, Նարիշկինի ընտանիքի անդամները, լրագրողների տվյալներով, բազմիցս օգտվել են միլիարդատիրոջ անձնական բիզնես ջեթից, օրինակ՝ ուղևորվել են այդ բիզնես ջեթով դեպի Բաքու և Ավստրիա։ Իսկ Նարիշկինի դուստր Վերոնիկան աշխատում է միլիարդատիրոջ «Ֆուդ-կլաստեր դեպո»-ում և իր 30-ամյակը նշել է Նիսանովին պատկանող «Ռեդիսոն Ֆլոտիլիա» նավի վրա իր ընկերուհու՝ Ադրբեջանի նախագահի դուստր Լեյլա Ալիևայի հետ։

Բացի այդ, Նարիշկինը, Նիսանովը և Ադրբեջանի ղեկավարությունը բիզնես գործընկերներ են: “Проект”-ը, մասնավորապես, պատմել էր անշարժ գույքի հետ կապված տարօրինակ գործարքների մասին։ 2011 թվականին Վերոնիկա Նարիշկինան դարձել է Նոր Արբատի շրջանում «կոմպոզիտորական տան» էլիտար 200 մետրանոց բնակարանի սեփականատեր ավելի քան 100 մլն ռուբլի շուկայական արժեքով: Ընդամենը երկու ամիս անց Վերոնիկա Նարիշկինան այդ բնակարանը փոխարինել է Լոմոնոսովի բնակելի համալիրում բնակարանի հետ: Նարիշիկինի դուստրն իր բնակարանը փաստորեն փոխանակել է Ադրբեջանի փոխնախագահի մտերիմ բարեկամ Էլման Բայրամովին պատկանող բնակարանի հետ: Բայրամովը ոչ միայն աշխատում է Նիսանովի հետ, այլև Ադրբեջանի փոխվարչապետ Յաղուբ Էյուբովի ընտանիքի անդամ է (նրա դուստրն ամուսնացած է քաղաքական գործչի որդու հետ): Բայրամովը Նարիշկինի հետ ամեն օր նույն ժամին այցելում է Նիսանովին պատկանող անձնական լողավազան, ընդ որում, այնտեղ է գալիս Ադրբեջանի դիվանագիտական համարանիշերով մեքենայով։

“Проект”-ի մի քանի բարձրաստիճան աղբյուրներ պնդել էին, որ Նիսանովը նաև ընկերություն է անում նախագահ Պուտինի մտերիմ ընկերների` Ռոտենբերգ եղբայրների հետ: «Եվ սա նույնպես ավելին է, քան բարեկամությունը։ Սա բիզնես է», - ընդգծում են լրագրողները։

Հիշեցնենք` Գոդ Նիսանովին պատկանող «Ֆուդ սիթի» առևտրի կենտրոնից էր սկսվել հայկական ծիրանների հետ կապված սկանդալը, երբ Հայաստանից արտահանված ծիրանները հրաժարվում էին ընդունել մոսկովյան առևտրի կենտրոններից շատերը։

Գոդ Նիսանովի ընկերությունում, այնուամենայնիվ, աշխատում են տասնյակ հայեր, հայ գործարարներից շատերն էլ ունեն բիզնես կապեր Նիսանովի հետ։ Ինքը Նիսանովն ազգությամբ հրեա է, ծնվել է Ադրբեջանում և իսկապես մտերիմ կապեր ունի Ռուսաստանի և Ադրբեջանի իշխանությունների հետ: Իսկ թե Նիսանով-Նարիշկին ընկերությունը որևէ կապ ունի ղարաբաղյան երկրորդ պատերազմում Ռուսաստանի դիրքորոշման հետ, իհարկե դժվար է ասել, “Проект”-ի լրագրողները ընդամենը հարցեր են բարձրաձայնում։

«Ազատությունը» հիշեցրել էր, որ մինչ Մոսկվայի հայ համայնքի տարբեր ներկայացուցիչներ ամեն առիթով խոսում են Ռուսաստանի իշխանությունների հետ մտերիմ կապերի մասին, Ադրբեջանի իշխանությունները ակտիվ աշխատում են Կրեմլին մոտ կանգնած ռուսաստանցի կշիռ ունեցող գործիչների հետ` ծախսելով դրա վրա հսկայական գումարներ և ծառայեցնելով այդ կապերը Ադրբեջանի պետական շահերի համար։

Մետաքսյա Շալունց