Նիկոլը մեր պետությանը հասցրել է 100 միլիարդ դոլարի վնաս․ Արեգնազ Մանուկյան (video)

Թալանից խոսողները մեր ժողովրդից թալանել են 100 միլիարդ դոլար. այս մասին Ֆրանսիայի հրապարակում ասաց ԱԺ «Հայաստան» խմբակցության պատգամավոր Արեգնազ Մանուկյանը:

Պատգամավորի ելույթն ամբողջությամբ՝ ստորև.

«Ողջու՛յն սիրելի հայրենակիցներ,

Մենք դուրս ենք եկել պայքարի՝ հանուն Հայաստանի, հանուն Արցախի, հանուն մեր ժողովրդի: Ես ոչ թե որպես պատգամավոր, այլ որպես երկու երեխաների մայր ու Հայաստանի քաղաքացի եմ խոսում: Ես մեկն եմ ձեզանից, ով կորցրել է իր հանգիստը: Սիրտս տանջվում է, երբ տեսնում եմ, թե ինչպես է մեր երկիրը մատաղացու գառան կարգավիճակով հայտնվել թուրք-ադրբեջանական օրակարգի զոհասեղանին:

Հայ ժողովուրդը և մեր երկիրը դավաճանվել են, ստի ու կեղծիքի զոհ դարձել: Սրանք իշխանության եկան մեր պատմությունը, մեր հերոսներին կեղծելով: Խոսում էին թալանից, բայց այնպիսի թալանի ենթարկեցին Հայաստանն ու Արցախը, ինչպիսին որ հայ ժողովուրդը երևի մոնղոլ-թաթարական արշավանքների ու օսմանյան կայսրության օրոք է տեսել:

Նիկոլ Փաշինյանը տապալեց Ղարաբաղյան հակամարտության բանակցությունները, Հայաստանին ու Արցախին մենակ թողեց մեր թշնամիների դեմ, հնարավորություն տվեց Թուրքիային ու Ադրբեջանին հարձակվել: 44-օրյա պատերազմն ու դրա արդյունքները դավաճանության, հիմարության, դիլետանտության համադրություն էին:

Արդեն կան հաշվարկներ, թե որքան վնաս է տվել Նիկոլը մեր երկրին: Խոսքը միայն մարդկային կյանքերի ու տարածքների մասին չէ: Եթե ֆինանսական լեզվով ասենք, ապա խոսվում է ավելի քան 100 միլիարդ դոլարի մասին:

Ժողովո՛ւրդ ջան, պատկերացրե՛ք: Թալանից խոսողները մեր ժողովրդից թալանել են 100 միլիարդ դոլարից ավելի: Կրկնում եմ՝ 100 միլիարդ դոլար: Արցախում հայկական կողմը կորցրել է 118 համայնք՝ քաղաքներ և գյուղեր: Հայաստան համահայկական հիմնադրամի միջոցներով Արցախի կորսված տարածքներում իրականացված բոլոր ծրագրերի համար ծախսվել էր շուրջ 35 միլիարդ դրամ: Պատերազմի օրերին հիմնադրամի միջոցներից, ռազմական ծախսերի անվան տակ, անհետացել է 100 միլիոն դոլար:

Մեր կորուստները նյութական ու հոգևոր ոլորտից են, էլ չհաշված ապագայի կորուստները, որ սրանց պատճառով ենք ունենալու: Այս ամենի հանրագումարը 100 միլիարդ դոլար է: Ամենահամեստ հաշվարկներով: Ահա սա՛ է թալանը: Սրանք հայ ժողովորդին թալանեցին ու հիմա էլ ուզում են մնացածը հանձնել, որպեսզի փրկեն իրենց կաշիները՝ կեղծ խաղաղասիրական քարոզի ներքո: Թո՞ւյլ ենք տալու:

Դե ուրեմն՝ միություն, պայքար, հաղթանակ: Միություն, պայքար, հաղթանակ»: