Եվրոպան հետողորմյա է անում․ կլինե՞ն սանկցիաներից հրաժարվողներ

Հունգարիան և Մոլդովան ռուսական գազի դիմաց կվճարեն ռուբլով։
RBC-ի փոխանցմամբ CNN-ի հետ զրույցում Հունգարիայի արտաքին գործերի նախարար Պետեր Սիյարտոն հաստատել է տեղեկությունը՝ նշելով, որ իրենք այլ ելք չունեն, քան ընդունել Կրեմլի պահանջը։
Հունգարիան կօգտագործի Ռուսաստանի կողմից առաջարկած սխեման՝ գազի գնի վճարման հաշվարկների համար։
Նրա խոսքով՝ Բուդապեշտը չունի այլընտրանքային աղբյուրներ և մատակարարման այլ ուղիներ, որոնք հնարավորություն կտան առաջիկա մի քանի տարիներին հրաժարվել ռուսական էներգակիրների ներմուծումից։
«Հունգարիայի գազի 85 տոկոսը ստանում ենք Ռուսաստանից, նավթի մատակարարումների 65 տոկոսը ևս Ռուսաստանից է գալիս։ Ինչո՞ւ։ Որովհետեւ դա որոշվում է ենթակառուցվածքով։ Դա հաճույքի համար չէ, մենք չենք ընտրել այս իրավիճակը»,- նշել է Սիյարտոն։

Մոլդովայի նախագահ Մայա Սանդուն նախօրեին Jurnal TV-ի եթերում հայտարարել է, որ իրենք շահագրգռված են շարունակել գազ գնել «Գազպրոմ»-ից, քանի որ այլընտրանքային շուկաներից դրա ձեռք բերումը շատ ավելի թանկ կարժենա։

«Եթե խոսենք այլընտրանքի մասին, ապա մենք ունենք տեխնիկական ուղիներ, բայց դեռ պետք է գտնել մատակարար, որը կառաջարկի միջնաժամկետ պայմանագիր։ Էլեկտրաէներգիայի հետ կապված վիճակն էլ ավելի բարդ է, կառավարությունը մրցույթ է հայտարարել այն գնելու համար, բայց առաջարկները չեն բավարարում մեզ, քանի որ դրանք շատ թանկ են»,- ասել է Մոլդովայի ղեկավարը՝ ընդգծելով, որ երկիրը «շատ ծանր վիճակում է»։
Գերմանական Wintershall Dea նավթագազային ընկերության ղեկավար Մարիո Մեhրենը նույնպես հայտարարել է, որ իրենք առայժմ չեն կարող հրաժարվել ռուսական գազից։ Չնայած նա հայտարարել է նաև, որ Ռուսաստանը հատել է կարմիր գծերը և ուկրաինական պատերազմով ավարտվում է ռուս-գերմանական տնտեսական համագործակցության դարաշրջանը։ Այնուամենայնիվ՝ Մեհրենը պարզաբանել է, որ ռուսաստանյան գազը կարող է փոխարինվել, բայց դա արագ տեղի չի ունենա, ինչպես բազմիցս ասել է Գերմանիայի կառավարությունը։ Wintershall-ը պատասխանատու է Եվրոպայում էներգետիկ ոլորտի և իր աշխատակիցների համար, ուստի ղեկավարությունը որոշել է շարունակել մասնակցել Ռուսաստանում գործող նախագծերին:

Ընկերությունն իր գործունեությունը կկենտրոնացնի Ռուսաստանից դուրս սեփական պորտֆոլիոյի ամրապնդման եւ էներգիայի աղբյուրների դիվերսիֆիկացման վրա, սակայն դրա համար ժամանակ կպահանջվի։
Նախօրեին հայտնի դարձավ, որ ռուսական գազի մատակարար «Գազպրոմ» ընկերությունը հայտարարել է, որ դադարեցրել է Բուլղարիայի և Լեհաստանի գազի մատակարարումը։
Փաստացի Եվրոպան հետողորմյա է անում՝ հրաժարվելով նախապես արված իր պատժամիջոցային քայլերից։
Միաժամանակ ԱՄՆ Կոնգրեսի Ներկայացուցիչների պալատը նախօրեին հավանություն է տվել օրենսդրական մի նախաձեռնության, որի ընդունման դեպքում ԱՄՆ իշխանությունները Կիևեին կփոխանցեն Ռուսաստանի սառեցված ակտիվները՝ որպես լրացուցիչ օգնություն պատերազմի մեջ գտնվող Ուկարինային։

Հայկ Դավթյան