«Գորշ գայլերի» ահաբեկչական ժեստ Թուրքիայից, գումարած՝ Միրզոյան-Բայրամով համաձայնություն

Նրանք, ովքեր դեռ մինչ օրս չեք կորցրել զարմանալու ունակությունը՝ Հայաստանի իշխանությունների կողմից նորանոր առիթներ են տրվում նման զգացողություններ ունենալու... Հերթական անգամ Անկարան «անկեղծանում է»:

Թուրքիայի արտգործնախարար Մևլութ Չավուշօղլուն ապրիլի 23-ին թուրքական ծայրահեղական «Գորշ գայլեր» կազմակերպության ժեստն է ցույց տվել Ուրուգվայի հայ համայնքի ցուցարարներին, որոնք երթ էին կազմակերպել Հայոց ցեղասպանության 107-րդ տարելիցի նախօրեին։ Դեպքը տեղի է ունեցել Ուրուգվայում Թուրքիայի դեսպանատան բացման արարողության ժամանակ: Նշենք, որ արտգործնախարար Չավուշօղլուն հանդիպել է իր ուրուգվայցի գործընկեր Ֆրանցիսկո Բուստիլյոյի հետ։
Հիշեցնենք, որ Հայոց ցեղասպանությունն աշխարհում առաջինը պաշտոնապես ճանաչել է Ուրուգվայը 1965 թվականին։ Ուստի Թուրքիայի արտաքին գերատեսչության ղեկավարի այցը Ուրուգվայ և այնտեղ դեսպանատան բացումը Հայոց ցեղասպանության տարելիցի նախօրեին պատահական չէ և քաղաքական որոշակի ուղերձ ու ենթատեքստ է պարունակում։

Ահա, Ուրուգվայում Թուրքիայի նոր դեսպանատան բացումից հետո տարածքից հեռացող Թուրքիայի ԱԳ նախարարը իր դեմ բողոքի ակցիա իրականացնող հայերին «Գորշ գայլերի» նշանն է ցույց տվել՝ Ուրուգվայում ապաստանած Հայոց ցեղասպանության զոհերի ժառանգները Ուրուգվայի մայրաքաղաքում Թուրքիայի նոր դեսպանատան բացմանը ժամանած Թուրքիայի ԱԳ նախարարի դեմ Հայաստանի եռագույն դրոշներով և Հայոց Ցեղասպանության ժխտումը դատապարտող կարգախոսներով բողոքի ակցիա են իրականացրել։

Այնուհետև, տեղեկատվություն տարածվեց, որ Մոնտեվիդեոյում Թուրքիայի դեսպանին կանչել են երկրի ԱԳՆ՝ Թուրքիայի ԱԳ նախարար Մևլյութ Չավուշօղլուի՝ հայ ցուցարարներին ուղղված ռասիստական ժեստի պատճառով: Հաշվի առնելով այդ իրավիճակը՝ Ուրուգվայի ԱԳ նախարար Ֆրանսիսկո Բուստիլյոն որոշել է Թուրքիայի դեսպանին կանչել ԱԳՆ:

Պաշտոնական Երևանից էլ քիչ անց արձագանք հնչեց... «Հայոց ցեղասպանության 107-րդ տարելիցի նախօրեին Թուրքիայի ԱԳ նախարար Մևլութ Չավուշօղլուի ազգայնական ժեստը՝ ցուցադրված Մոնտեվիդեոյում հայ համայնքի ներկայացուցիչներին, դատապարտելի գործողություն է և ոչ մի կերպ չի նպաստում երկու ժողովուրդների միջև փոխըմբռնման մթնոլորտի և երկխոսության ձևավորմանը։ Այդ մասին ֆեյսբուքում գրել է ՀՀ ԱԺ «Քաղաքացիական պայմանագիր» խմբակցության պատգամավոր, ՀՀ ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանը։ Ողջունում ենք ուրուգվայական կողմի անհապաղ արձագանքը՝ Թուրքիայի դեսպանին երկրի արտաքին գերատեսչություն կանչը՝ բացատրություններ ներկայացնելու համար»։

Սա էլ պաշտոնական Երևանի կողմից մի թեթև դատապարտող հայտարարություն էր՝ «արարողակարգային» պարզապես: Ընդամենը մեկ օր անց ապրիլի 24-ից, և 2 օր անց Թուրքիայի արտգործնախարարի սանձարձակ ու լկտի պահվածքից, հանկարծ տեղեկություն է ստացվում, որ Հայաստանի և Ադրբեջանի ԱԳ նախարարների միջև հեռախոսազրույց է կայացել...

ՀՀ ԱԳՆ-ի տարածած հաղորդագրությունում ասվում է. «Հայաստանի ԱԳ նախարար Արարատ Միրզոյանը հեռախոսազրույց է ունեցել Ադրբեջանի ԱԳ նախարար Ջեյհուն Բայրամովի հետ։ Նախարարները մտքեր են փոխանակել երկու երկրների առաջնորդների մակարդակով ձեռք բերված պայմանավորվածությունների կատարման շուրջ։ Կողմերը համաձայնության են եկել սահմանազատման և սահմանային անվտանգության հանձնաժողովի կառուցվածքի շուրջ: Պայմանավորվածություն է ձեռք բերվել առաջիկայում սահմանազատման և սահմանային անվտանգության հանձնաժողովի վերաբերյալ հանդիպում անցկացնել։ Կողմերը քննարկել են նաև հումանիտար խնդիրների լուծման, ինչպես նաև խաղաղ բանակցությունների նախապատրաստման հետ կապված հարցեր»:

Այսինքն, «խաղաղության դարաշրջանի» Փաշինյանի իշխանության քայլերն են հետևողական շարունակվում է՝ անկախ այն հանգամանքից, որ ընդամենը 2 օր առաջ Մևլութ Չավուշօղլուն ապրիլի 23-ին թուրքական ծայրահեղական «Գորշ գայլեր» ահաբեկչական կազմակերպության ժեստն է ցույց տվել Ուրուգվայի հայ համայնքի ցուցարարներին, որոնց շարքերում, վստահաբար, Ցեղասպանության զոհերի ժառանգներ եղած կլինեն:

Սա է «խաղաղասեր» Անկարան ու Բաքուն... Լրացուցիչ ապացույց, որ Հայաստանի գործող իշխանություններն անկախ բոլոր «հանգամանքներից»՝ առաջ են գնում իրենց պլանով:

Մետաքսյա Շալունց