Չեմ հարգում դատարանին․ Արեգ Կյուրեղյանի նկատմամբ սանկցիա կիրառվեց

Ավան եւ Նոր Նորք վարչական շրջանների ընդհանուր իրավասության դատարանում «Սասնա ծռերի» գործով դատական նիստի ժամանակ նախագահող դատավոր Արտուշ Գաբրիելյանը դատական սանկցիա կիրառեց խմբի ադամ Արեգ Կյուրեղյանի նկատմամբ՝ նրան 10 ժամով հեռացնելով դատական նիստերի դահլիճից։ Մինչ այդ՝ դատական նիստը հերթական անգամ ընդմիջվել էր պաշտպանների վարքը քննելու և որոշում կայացնելու համար, որովհետև պաշտպաններ Աննա Ջուվանովան, Երվանդ Վարոսյանը, Դավիթ Գյուրջյանը, Հրանտ Գևորգյանը, Արա Ղարագյոզյանը, Արմինե Ֆանյանը, Տիգրան Հայրապետյանը, Հարություն Բաղդասարյանը և Ինեսսա Պետրոսյանը բոյկոտել էին նիստն ու լքել նիստերի դահլիճը: Խորհրդակցական սենյակից վերադառնալուց հետո Արտուշ Գաբրիելյանը դատական սանկցիա կիրառեց նշված իննը պաշտպանների նկատմամբ՝ պատասխանատվության ենթարկելու դիմումով դիմելով Փաստաբանների պալատ: Դատարանի հարցին, թե մյուս դատական նիստը կարող են շարունակել առանց նրա պաշտպանյալների ներկայության, Արեգ Կյուրեղյանը հայտնեց, որ իր պաշտպանից չի հրաժարվում և չի հրաժարվելու.«Նա մնալու է իմ պաշտպանը, իսկ սա ինձ համար դատական նիստ չէ, այո, ես չեմ հարգում դատարանին»: Դատավորը այս խոսքը համարեց անհարգալից վերաբերմունք դատարանի հանդեպ եւ նրա նկատմամբ սանկցիա կիրառեց նախազգուշացման տեսքով՝ նշելով, որ, եթե հաջորդ անգամ նման վերաբերմունք դրսեւորի կհեռացվի դատական նիստերի դահլիճից։ Կյուրեղյանն էլ ասաց․ «Կրկին ասում եմ՝ չեմ հարգում դատարանին, պարզ եւ հստակ»: Դատավոր Արտուշ Գաբրիելյանը նրա նկատմամբ կիրառեց դատական սանկցիա՝ նիստերի դահլիճից 10 ժամով հեռացում: