Ձեզ ինչի՞ տեղ եք դրել․ Ալեն Սիմոնյան պատասխանի էդ հարցին․ Մոսիյան (video)
Հայաստանի իշխանություններին հորդորում եմ՝ դադարեցնել այդ ահաբեկությունը, պատերազմով վախեցնելը՝ թե Հայաստանի, թե Արցախի, թե աշխարհասփյուռ ժողովրդին։ Այս մասին այսօր՝ ապրիլի 14-ին, Արցախի ԱԺ արտահերթ նիստին ելույթի ժամանակ ասաց «Հայ Հեղափոխական Դաշնակցության» պատգամավոր Արթուր Մոսիյանը։
Նա պատմեց, որ ամիսներ առաջ ԱՀ ԱԺ պատգամավորները մի շարք հանդիպումներ են ցանկացել ունենալ միջխորհրդարանական հանձնաժողովի ֆորմատով, սակայն հանձնաժողովը չի կայացել եւ իրենք ուղեւորվել են Երեւան, հանդիպել ԱԺ նախագահի եւ մի քանի պատգամավորների հետ.
«Ես հարց ուղղեցի ԱԺ նախագահ Ալեն Սիմոնյանին, ասելով, կարգավիճակ ասելով ձեր իշխանությունն ի՞նչ է հասկանում եւ կարո՞ղ է մի օր ասեք՝ Ադրբեջանի կազմում, Ալեն Սիմոնյանը վիրավորված ասաց՝ մեզ ինչի՞ տեղ եք դնում, իհարկե, խոսքը վերաբերում է կամ անկախացմանը կամ Հայաստանին միացմանը, հո չենք ասելու Ադրբեջանի կազմում։ Փաստորեն վարչապետի երեկվա ելույթից եւ իջեցրած հրահանգի շնորհիվ որոշ պատգամավորների ելույթներից հետո պարզ դարձավ մի պարզ ճշմարտություն, էն ինչ մենք մտածում էինք, դժբախտաբար, դարձավ իրականություն։ Ես հավատացնում եմ, որ այդ տեսակը մեր ժողովրդի մեջ շատ չէ, չի կարող հայ ազգի մեջ այդ տեսակը լինել մեծամասնություն։ Հայաստանի իշխանություններին հորդորում եմ՝ դադարեցնել այդ ահաբեկությունը, պատերազմով վախեցնելը՝ թե Հայաստանի, թե Արցախի, թե աշխարհասփյուռ ժողովրդին»։
Մոսիյանի խոսքով՝ արդեն վերջին պատերազմից հետո թե ՛Փաշինյանը, թե՛ Ալիեւը արցախցիների հետ խոսում են նույն լեզվով.
«Նայելով այդ 5 կետերին՝ տեսնում ենք, որ ոչ միայն վտանգվում է մեր բազմահազար զոհերի գնով ձեռք բերված անկախությունը, այլ նաեւ կետ կա, որ ապագայում Հայաստանի Հանրապետությունը երբեւէ որեւէ պահանջ չի կարող ներկայացնել։ Այս աղետալի քայլով Նիկոլ Փաշինյանը եւ իր վարչախումբը ոչ միայն զրոյացնում են մեր սերունդների, բազմահազար զոհերի, վիրավորների թափած արյան գինը, այլ նաեւ ապագա սերունդների համար է որոշում՝ այդ կետն ամրագրելով։ Իմ դաստիարակությունն ինձ թույլ չի տալիս նույն հարցը տալ Ալեն Սիմոնյանին, ես կխնդրեի, որ ինքը պատասխաներ այդ հարցին՝ իրենք իրենց ինչի՞ տեղ են դրել, որ մի խմբակով ուզում են որոշել մի ամբողջ ժողովրդի ճակատագիր թե Արցախում, թե Հայաստանում»։
Հետևեք մեզ Viber-ում
