Ամենաբացասական սցենարները տեղի ունեցան Բրյուսելու՞մ․ Արամ Վարդևանյան (video)

Ասել, որ ամենաբացասական սցենարները տեղի ունեցան՝ ոչ: Այս մասին, այսօր՝ ապրիլի 7-ին, ԱԺ-ում լրագրողների հետ զրույցում ասաց «Հայաստան» խմբակցության պատգամավոր Արամ Վարդեւանյանը՝ անդրադառնալով երեկ Բրյուսելում տեղի ունեցած Փաշինյան-Միշել-Ալիև եռակողմ հանդիպմանը և դրա արդյունքների վերաբերյալ հայտարարություններին:

«Դա կարող է պայմանավորված լինել բազմաթիվ հնգմանքներով, այդ թվում այն քաղաքական գործընթացներով, որոնք տեղի ունեցան թե Երեւանում, թե Արցախի ԱԺ-ի կողմից ներկայացված արձագանքներով»,-ասաց նա:

Անդրադառնալով Բրյուսելում կայացած հանդիպումից հետո տարածված հայտարարությանը, Վարդեւանյանն ասաց, որ այն մի քանի մասշտաբային թերություն ունի. «Առաջին, դուք տեսնում եք, որ այնտեղ Արցախ բառը հիշատակված չէ: Ինչպե՞ս է ստացվում, որ ՀՀ իշխանությունները խոսում են հումանիտար աղետի մասին Արցախում եւ դրանից հետո ոչ մի բառ չի հիշատակվում հայտարարության մեջ: Ո՞նց չի խոսվում այն մասին, որ Ադրբեջանի քաղաքականությունը էթնիկ զտման քաղաքականություն է Արցախում: Այսինքն ՀՀ-ն դա չի պաշտպանել: Եթե Հայաստանը պնդեր , չէր կարող դա հայտարարությունում չլիներ:

Երկրորդ, խոսվում է դեմարկացիա, դելիմիտիացիայի մասին. եթե մենք ունենք Արցախում այն իրավիճակը, որ ունենք, ինչո՞վ է պայմանավորված, որ խոսում ենք դեմարկացիայի ու դելիմիտացիայի մասին: Այսինքն գնում ես դեմարկացիա անես մի երկրի հետ, որը էթնիկ զտման քաղաքականություն է իրականացնում, որը գազ է անջատում, զինված գործողություններ է անում:

Երրորդը, այդ հայտարարությունում չկա ԵԱՀԿ Մինսկի խմբի համանախագահության մասին ոչ մի բան»,-հայտարարեց Վարդեւանյանը:

Նա նշեց, որ այս հայտարարությունում ինքը դրական բան չի տեսնում, մեծ անհանգստության առիթ է տեսնում:

Վարդեւանյանն օրինակ բերեց՝ նշելով. «ասենք, մեկն ուզում է վաճառել իր բնակարանը: Եթե մյուս կողմը, որը պետք է գա վճարի, գալիս ձեր դուռն է ջարդում, պատուհանն է ջարդում, գալիս ահաբելում է ձեր ընտանիքին, դուք շարունակելո՞ւ եք նրա հետ բանակցությունները:

Այս խայտառակ իրավիճակի այլընտրանքը պատերազմը չի: Չի կարելի Հայաստանի ներսում էլ վախեցնելու քաղաքականություն վարել: Պատերազմի առկայության կամ հնարավորության հանգամանքները չի նշանակում, որ պետք է գնաս քեզ կզած պահես, այդպես չի»,-հայտարարեց Վարդեւանյանը:

Նա նաեւ նկատեց, որ ՀՀ իշխանությունը ձեռքերը լվացել է Արցախից:

Ավելի վաղ NEWS.am-ը հայտնել էր, որ երեկ Բրյուսելում տեղի է ունեցել Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի եռակողմ հանդիպումը։ Հանդիպման արդյունքներով ձեռք է բերվել պայմանավորվածություն` 2021թ. նոյեմբերի 26-ին Սոչիում ձեռք բերված համաձայնության համաձայն` մինչև ապրիլի վերջ ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով, որը օժտված կլինի նաև սահմանի երկայնքով անվտանգություն և կայունություն ապահովելու հարցերով զբաղվելու լիազորությամբ։

Նիկոլ Փաշինյանն ու Ադրբեջանի նախագահը Արտաքին գործերի նախարարներին հանձնարարել են մեկնարկել երկու երկրների միջև խաղաղության բանակցությունների նախապատրաստական աշխատանքները: