Դեբեդ գետն ընկած կնոջ դին գտել են մի քանի տասնյակ կմ հեռավորության վրա

Լոռու մարզում նախօրեին՝ հուլիսի 17-ին, Դեբեդ գետում խեղդված կնոջ դին հայտնաբերվել է Տավուշի մարզի Այրում քաղաքի տարածքում: NEWS.am-ի թղթակիցը հաղորդում է, որ կնոջ դին դեպքի վայրից հայտնաբերվել է մի քանի տասնյակ կիլոմետր հեռավորության վրա: Այս պահին Տավուշի մարզային փրկարարներն իրականացնում են դիակի գետից դուրս բերման աշխատանքներ: Ավելի վաղ NEWS.am–ը հաղորդել էր, որ հուլիսի 17-ին, ժամը 15:30-ի սահմաններ ում Շնող-Քարկոփ գյուղերի հատվածում Դեբեդ գետն են ընկել Վանաձոր քաղաքի բնակչուհիներ 81-ամյա Ռոզա Վերմիշյանը եւ նրա դուստրը՝ 56-ամյա Սեդա Վարդանյանը: Աղջիկը դեպքի վայր ժամանած փրկարարներին հայտնել է, որ ինքն ու մայրը անցել են գետն իրենց այգին մշակելու համար, իսկ վերադառնալու ճանապարհին մայրը սայթաքել ու ընկել է գետը, ինքը փորձել է պահել մորը, սակայն չի կարողացել: Մեկ օր շարունակ ոստիկաններն ու փրկարարներն իրականացրել են որոնողական աշխատանքներ: Այսօր առավոտյան կնոջ դին գտնվել է Տավոիւշի մարզի Այրում քաղաքի տարածքում: Գետը դին քշել տարել է մի քանի տասնյակ կիլոմետր: