Հող է նախապատրաստվում Արցախի վերջնական հանձնման համար

 Տեղի է ունեցել հեռախոսազրույց վարչապետ Նիկոլ Փաշինյանի և ՌԴ նախագահ Վլադիմիր Պուտինի միջև: Փաշինյանը ՌԴ նախագահին է ներկայացրել Լեռնային Ղարաբաղում ռուս խաղաղապահների պատասխանատվության գոտի ադրբեջանական ստորաբաժանումների ներխուժումից հետո ստեղծված իրավիճակը։ Հայաստանի կառավարության հաղորդմամբ՝ վարչապետը ցավով արձանագրել է, որ իրադրությունը ոչ միայն չի կարգավորվել, այլև որոշ տվյալների համաձայն՝ ՌԴ խաղաղապահ զորախմբի պատասխանատվության գոտում հնարավոր են ադրբեջանական ստորաբաժանումների նոր սադրանքներ:

<<Վարչապետ Փաշինյանը մանրամասներ է ներկայացրել Լեռնային Ղարաբաղի գյուղերի բնակիչներին՝ բարձրախոսներով արվող հայտարարություններով ահաբեկելու, հոգեբանական ճնշումներ գործադրելու Ադրբեջանի գործելակերպի վերաբերյալ:
Նիկոլ Փաշինյանը կրկին ընդգծել է, որ խաղաղապահների ներկայությամբ ադրբեջանական ստորաբաժանումների այս գործողությունները և ներխուժումը Լեռնային Ղարաբաղում ռուս խաղաղապահ զորախմբի պատասխանատվության գոտի հարցեր է առաջացնում, ու ՌԴ նախագահին շնորհակալություն է հայտնել այդ իրավիճակի հետաքննություն անցկացնելու հարցին դրական վերաբերմունք ցուցաբերելու համար:
Վարչապետը ՌԴ նախագահին է ներկայացրել հայկական կողմի ակնկալիքը, որ ՌԴ խաղաղապահ զորախումբը միջոցներ կձեռնարկի ադրբեջանական ներխուժած ստորաբաժանումները ՌԴ խաղաղապահ զորախմբի պատասխանատվության գոտուց դուրսբերելու համար: Երկու երկրների ղեկավարները պայմանավորվել են՝ միջոցներ ձեռնարկել ստեղծված իրադրությունը շուտափույթ կարգավորելու համար: Նրանք երկուստեք կարևորել են 2020թ. նոյեմբերի 9-ի, 2021 թվականի հունվարի 11-ի և նոյեմբերի 26-ի՝ ՌԴ նախագահի, Հայաստանի վարչապետի և Ադրբեջանի նախագահի եռակողմ հայտարարությունների լիարժեք իրականացումը>>,- նշվում է կառավարության պաշտոնական հաղորդագրության մեջ:

Հատկանշական է, որ ՌԴ նախագահի պաշտոնական կայքում հրապարակված տեղեկատվության մեջ նշվում է, որ Վլադիմիր Պուտինը հեռախազրույցներ է ունեցել ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ։ «Քննարկվել է Լեռնային Ղարաբաղի շուրջ իրավիճակի զարգացումը` տարածաշրջանում անվտանգության և կայունության ապահովման համար գործնական խնդիրների լուծման վրա շեշտադրմամբ: Վերահաստատվել է 2020 թ. նոյեմբերի 9-ի, հունվարի 11-ի և 2021 թ. նոյեմբերի 26-ի եռակողմ հայտարարությունների բոլոր դրույթների հետևողական կատարման կարևորությունը։ Պայմանավորվածություն է ձեռք բերվել հետագա շփումների մասին»,- ասվում է հաղորդագրության մեջ,- նշվում է Կրեմլի կայքում հրապարակված տեքստում։

Ադրբեջանական զինուժի ելման դիրքեր վերադառնալու ու ռուս խաղաղպահների և ՌԴ ՊՆ-ի՝ երկու օր առաջ հրապարակած հայտարարության բովանադակության վերահաստատման մասին որևէ բառ կամ նախադասություն Մոսկվան չի հրապարակել։
Ալիևն էլ իր հերթին հայտարարել է, թե Հայաստանի հետ խաղաղության պայմանագիրը պետք է կնքվի հնարավորինս սեղմ ժամկետներում և իրենք Երևանից դրական ազդակներ են ստանում։ Ալիևը հույս ունի, թե Հայաստանի վարչապետ Փաշինյանի հետ առաջիկա հանդիպումը՝ Եվրոպական խորհրդի նախագահ Շառլ Միշելի մասնակցությամբ, արդյունավետ կլինի։ Turan գործակալության հաղորդմամբ՝ այս մասին նա ասել է ԵԱՀԿ գործող նախագահ, Լեհաստանի արտգործնախարար Զբիգնև Ռաուի հետ հանդիպման ժամանակ։

«Մենք պետք է առաջ շարժվենք դեպի խաղաղություն, որի շուրջ պայմանագիր պետք է կնքվի Ադրբեջանի և Հայաստանի միջև սեղմ ժամկետներում»,- ասել է Ալիևը։
Նրա խոսքով՝ հայկական կողմը հայտարարում է, որ ընդունում է Բաքվի առաջարկները, և դա լավ նշան է։ «Սա շատ լավ է, և ես հուսով եմ, որ իրավիճակը կպարզվի Բրյուսելում»,- ասել է Ալիևը։

Կառավարության վերջին նիստում Նիկոլ Փաշինյանը բաց տեքստով հայտարարեց, թե Ալիևի պահանջը՝ Արցախից հայկական զինուժի վերջական դուրսբերումն է, ինչպես նաև Ադրբեջանի տարածքային ամբողջականության ճանաչումը՝ Արցախին էլ դիտարկելով դրա մի մաս։ Ադրբաեջանը ուզում է Մոսկվայի՝ ուկրաինական կոնֆլիկտով պայմանավորված լարվածությունը օգտագործել ի նպաստ իրեն և Արցախի հարցը լուծել իր պահանջներով։ Նա այս հարցում ունի Հայաստանի իշխանության լիակատար աջակցությունը։ Նիկոլ Փաշինյանի՝ վերջին օրերի բոցաշունչ տեքստերն ընդամենը Մոսկվայի համար են։ Ըստ էության, փոխադարձ պայմանավորվածությամբ, բավարար հող է նախապատրաստվում՝ Արցախի վերջնական հանձնման համար։ Փաշինյան-Ալիև առաջիկա հանդիպումն այս առումով կարող է շրջադարձային լինել։

Հայկ Դավթյան