Փարուխ VS Վեդի
Վերջին օրերի լրահոսը լարված էր։ Ադրբեջանցիներն Արցախում մտել էին հայկական Փարուխ գյուղ, Քարագլխում վերցրել մի քանի դիրք։ Ունեցանք զոհեր և վիրավորներ։ Ադրբեջանն էլ կորուստներ ունի, սակայն մեր թշնամիները հստակ թվեր չեն ներկայացնում։
Տեղի է ունեցել զինված բախում, մերոնք լավ կռիվ են տվել և ազիկները ստիպված են եղել ԱԹՍ՝ «Բայրաքթար» կիրառել։
Ռուսաստանի պաշտպանության նախարարությունը սկզբում շատ հստակ մատնանշեց, որ մեղավորն ադրբեջանական կողմն է, որը խախտել է 2020–ի նոյեմբերի 9–ի համաձայնագիրը։ Նաև նշվեց, որ Ադրբեջանը պետք է հետ քաշվի Փարուխից։
Ադրբեջանի պաշտպանության նախարարությունն ի պատասխան հայտարարեց, որ դուրս չի գալու։ Հետո կրկին եղավ ՌԴ ՊՆ հայտարարությունն այն մասին, որ ադրբեջանցիները դուրս են եկել Փարուխից, ինչին կրկին հետևեց Ադրբեջանի ՊՆ հայտարարությունը, թե բա ռուսները ստում են, մենք Փարուխից դուրս չենք եկել։
Մեր ունցած տեղեկություններով՝ ադրբեջանիցներն իրականում դուրս են եկել Փարուխից, բայց դեռ մնում են Քարագլխում։
Ակնհայտ է, որ Ադրբեջանը փորձում է օգտվել Ուկրաինայում ստեղծված իրավիճակից ու ձեռքի հետ էլ ստուգել ռուս խաղաղապահների զգոնությունը։ Ակնհայտ է նաև, որ Ադրբեջանը, թերևս, Ուկրաինայից հետո ամենաթշնամականն է տրամադրված ՌԴ–ի հանդեպ։ Համենայնդեպս ադրբեջանական մամուլը ուկրաինականին չի զիջում հակառուսականությամբ։ Դա է նաև պատճառը, որ ադրբեջանական որոշ կայքերի հասանելիությունն արգելված է Ռուսաստանում։
Թե ինչպիսի զարգացումներ կունենանք Քարագլխի, Արցախի գազամատակարարման հետ՝ մասնավորապես և ռուս–ադրբեջանական հարաբերություններում՝ ընդհանրապես, կերևա շատ շուտով։
Ի դեպ, Փարուխի շուրջ տեղի ունեցող զարգացումներում մի բան աչք ծակեց։ ՌԴ–ի ու Ադրբեջանի պաշտպանության նախարարությունները հաղորդագրություն էին տարածում, միմյանց հայհոյում, բայց չկար... ՀՀ ՊՆ–ը։ Հայաստանի պաշտպանության նախարար Սուրեն Պապիկյանն իր թիմակիցների հետ այդ ընթացքում զբաղված էր Վեդիում տոկոս խփելով։
Ադրբեջանցիները գրավում էին Փարուխը, իսկ ՀՀ ՊՆ–ը՝ Վեդին։ Երկու տեղում էլ Հայաստանն ու Արցախը պարտվողի դերում էին, իսկ Ադրբեջանը՝ հաղթողի։
Նիկոլ Փաշինյանի իշխանությունը ձեռքերը լվացել է Արցախից, արտաքին քաղաքականության մեջ առաջ է տանում թուրքական օրակարգն ու զբաղված է բացառապես իշխանություն պահելու խնդրով։ Նույն Վեդիում սրանք այնպիսի ապօրինություններ թույլ տվեցին, որ գերազանցեցին նախորդ բոլոր կեղծիքները։ Ավելացրեցին ընտրողների թիվը, կասկածելի մասնակցություն ապահովեցին ու «կռակադիլին» դարձրին համայնքապետ։
Մնում է արձանագրել, որ Ադրբեջանը շարունակում է հաղթել Հայաստանին։ Լինի դա Քարագլխում, Փարուխում, թե Վեդիում։ Մինչև ներքին թշնամուն չհաղթենք, արտաքինը շարունակելու է իր լկտի պահվածքը։
Կորյուն Մանուկյան
Հ.Գ. Ուշագրավ է, որ ադրբեջանական ու նիկոլական շրջանակները համատեղ հակառուսական քարոզ են տանում։ Ամեն մեկն իր ձևով հարցականի տակ է դնում Արցախում ռուս խաղաղապահների ներկայության արդյունավետությունն ու անհրաժեշտությունը։
Ինչ խոսք, Նիկոլն ու Ալիևը շարունակում են «պասերով» խաղալ։
Հետևեք մեզ Viber-ում
