Պապիկյան ու Սանոսյանը աշխատանքի ժամին Գարիկ Սարգսյանի փիառով են զբաղված

«Հրապարակ օրաթերթը» գրում է․ Իշխանական ողջ թիմն իր ունեցած-չունեցած ռեսուրսը մոբիլիզացրել է ոչ թե Հայաստանի առջեւ ծառացած արտաքին ու ներքին խնդիրները լուծելու համար, այլ իր հակառակորդներին եւ իրեն քննադատողներին չեզոքացնելու, ինչպես նաեւ  իշխանության թեկուզ ներքին օղակներում վերարտադրվելու, ավելի ճիշտ՝ իշխանազավթելու վրա։ Արցախում հումանիտար աղետ է, հայ-ադրբեջանական սահմանին՝ լարված վիճակ, ադրբեջանցիները հերթական ներխուժումն են կատարել  ՀՀ սուվերեն տարածք՝ այս անգամ Սյունիքի մարզի Ներքին Հանդ համայնք, բողոքի ակցիաներ են ամենուր։ Իսկ ՀՀ իշխանությունները փոխանակ օրախնդիր հարցերով զբաղվեն եւ հատկապես անվտանգային խնդիրներով, զբաղված են Վեդիում ՔՊ թեկնածու կոկորդիլոսագետ Գարիկ Սարգսյանի նախընտրական PR-ով։

 Եվ հատկապես ապշեցուցիչ է, որ Հայաստանի պաշտպանության նախարար Սուրեն Պապիկյանն է նաեւ դրանով զբաղված։ Նախօրեին Երեւանից մի խումբ  պաշտոնյաներ՝ Պապիկյանի գլխավորությամբ, աշխատանքային ժամերին, իրենց բանուգործը թողած, շտապել էին Արարատի մարզի Վեդի համայնք, որ մասնակցեին Գարիկ Սարգսյանի նախընտրական արշավին։

Պաշտոնական տեղեկատվության համաձայն՝ նրանք հանդիպում են ունեցել ՔՊ ակտիվի հետ՝ «հանդիպման ընթացքում քննարկել են Վեդու ՏԻՄ ընտրությունների քարոզարշավի ընթացքը եւ պատասխանել են հետաքրքրող հարցերին»։ Գարիկ Սարգսյանի «գրուպպա պադդերժկայի» ներկայացուցիչներն են ԱԺ պատգամավորներ Արսեն Թորոսյանն ու Ռուստամ Բաքոյանը, ՏԿԵ նախարար Գնել Սանոսյանը եւ, իհարկե, ծանր հրետանին՝ Պնախարար Սուրեն Պապիկյանը։ Հիշեցնենք, որ նախօրեին Գնել Սանոսյանի հարազատ մարզում՝ Գեղարքունիքում, բողոքի թեժ ակցիաներ էին, Ծովագյուղ եւ Սեմյոնովկա համայնքների հարյուրավոր բնակիչներ վաղ առավոտից փակել էին Երեւան-Սեւան ավտոճանապարհը եւ պահանջում էին, որ պաշտոնյաները ներկայանան եւ լսեն իրենց, լուծում տան իրենց խնդրին։ Նրանք անվանապես դիմում էին Գնել Սանոսյանին, թե՝ արի Սեւան։ Բայց Գնել Սանոսյանը կուսակցական հավաքը  նախընտրել էր իր բուն պարտականություններից եւ մեկնել էր Վեդի։ Եթե պատգամավոր Ռուստամ Բաքոյանը գոնե ընտրվել է Արարատի մարզից եւ կարող է սա որպես ընտրողների հետ հանդիպում ներկայացնել, ապա մյուսների պարագան ոչ մի բացատրություն չունի։ Աշխատանքի ժամին այսքան անթաքույց ադմինիստրատիվ ռեսուրս օգտագործել՝ անգամ ՀՀԿ-անների ժամանակ չկար։ Ի դեպ, երեկ մարզում խոսում էին, որ իշխանությունը համատարած փող է բաժանում՝ որոշել են ամեն գնով հաղթել ընտրություններում։ Սա նշանակում է, որ Գարիկ Սարգսյանի վիճակն այնքան վատ է, որ մնացել է ընտրական «տասովկաների» եւ զեղծարարությունների հույսին։ Հիշեցնենք, որ  անցած տարեվերջին Արսեն Թորոսյանն էր ղեկավարում ՔՊ Գյումրիի նախընտրական կամպանիան, որտեղ իշխանական կուսակցությունը խայտառակ պարտություն կրեց եւ միայն շանտաժի գործիքներով զավթեց քաղաքի կառավարումը։ 

Երեկ մարզի իշխանականներն էլ էին անկեղծանում, որ Գարիկ Սարգսյանի դիրքերը բավականին խարխուլ են։ Չնայած մի քանի ամիս է՝ անխնա վատնում են պետական բյուջեն եւ սոցիալական աջակցության անվան տակ բնակիչներին գումար բաժանում, վարչական լծակներ են օգտագործում, ազատում մանկապարտեզների ոչ յուրային տնօրեններին՝ նշանակելով յուրայիններին, սակայն ներքին հարցումների արդյունքները հուսադրող չեն։ Վերջին օրերին մենք անանուն ահազանգեր ենք ստանում, որ մարզի բնակիչներին իշխանական «տասովշչիկները» քվեի դիմաց գումար են առաջարկում՝ սկսած 15 հազար դրամից։ 

Հիշեցնենք, որ Վեդիում երկու կուսակցություն է մասնակցում՝ ՔՊ-ն եւ նախորդ ընտրություններում երկրորդ տեղը զբաղեցրած «Իմ հզոր համայնքը»՝ Սպարտակ Թարթիկյանի գլխավորությամբ։ Դեկտեմբերի 5-ին երրորդ մասնակիցն էլ կար՝ Արամ Սարգսյանի «Հանրապետությունը»։