ՌԴ-ի և ՆԱՏՕ-ի հարաբերությունների բարելավման հույսով

Համայն Ռուսիո պատրիարք Կիրիլը հույս ունի, որ Հռոմի պապ Ֆրանցիսկոսի հետ հանդիպումը կնվազեցնի լարվածությունը Ռուսաստանի և ՆԱՏՕ-ի միջև հարաբերություններում՝ գրում է ria.ru-ն: «Դա հանդիպում էր երկու մարդկանց, որոնք անհանգստացած են այն ամենով, ինչ այսօր ընդհանրապես կատարվում է աշխարհում՝ հաշվի առնելով այն մեծ լարվածությունը, որ այսօր առկա է Արևելքի և Արևմուտքի միջև, իսկ ավելի կոնկրետ՝ Ռուսաստանի և ՆԱՏՕ-ի միջև: Այդ մտահոգությունը լուրջ խոսակցության թեմա դարձավ: Մի շարք հասարակական հարցերում, որոնց շուրջը դեռ երեկ, թվում էր, հնարավոր չէ համաձայնության գալ, մենք այսօր լիովին համակարծիք էինք»,- ասել է նա լրագրողներին՝ ամփոփելով Լատինական Ամերիկա և Անտարկտիկա կատարած իր երկշաբաթյա ուղևորությունը: Հիշեցնենք, որ փետրվարի 11-22-ը Ռուսաստանի պատրիարքը այցելել է Լատինական Ամերիկա և Անտարկտիկա: Այդ ուղևորության ընթացքում ամենակարևոր իրադարձությունը, որ անկասկած տեղ կգտնի պատմության դասագրքերում, Հռոմեա-կաթոլիկ և Ռուսաստանի ուղղափառ եկեղեցիների առաջնորդների հանդիպումն էր: Փետրվարի 12-ին Հավանայում նրանք ստորագրեցին միացյալ հայտարարություն, որով միջազգային հանրությանը կոչ են անում միավորել Մերձավոր Արևելքում և այլ տարածաշրջաններում քրիստոնյաների պաշտպանությանն ուղղված ջանքերը: