Ռուսական ուժերը նախատեսում են գրոհել Ուկրաինայի դեմ. Բայդեն

Ուրբաթ օրը նախագահ Ջո Բայդենը Սպիտակ տանը ելույթ է ունեցել լրագրողների առջեւ եւ մեկ անգամ եւս անդրադարձել Ուկրաինայի շուրջ իրավիճակին։ ԱՄՆ նախագահն ասել է, որ Վլադիմիր Պուտինն Ուկրաինա ներխուժելու որոշումն արդեն կայացրել է, տեղեկացնում է «Голос Америки»-ն։

«Մենք հիմքեր ունենք ենթադրելու, որ ռուսական ուժերը նախատեսում են գրոհել Ուկրաինայի դեմ հաջորդ շաբաթ, առաջիկա օրերին»,- ասել է Բայդենը:

ԱՄՆ նախագահը հավաստիացրել է, որ եթե ռազմական գործողություններն սկսվեն մինչեւ փետրվարի 24-ը, երբ նախատեսված է պետքարտուղար Էնթոնի Բլինքենի եւ ԱԳՆ ղեկավար Սերգեյ Լավրովի հանդիպումը, ճանապարհը դիվանագիտության համար կփակվի։

Բայդենը նաեւ նախազգուշացրել է Ռուսաստանի դեմ «կոշտ պատժամիջոցների» մասին՝ ներխուժման դեպքում, նա ընդգծել է, որ «դեռեւս ուշ չէ» ընտրելու դիվանագիտական բանակցությունների եւ լարումը թուլացնելու ճանապարհը։

Բայդենի խոսքով՝ Ռուսաստանը Ուկրաինայի հետ սահմանին կենտրոնացրել է մոտ 150 000 զինծառայող։

Նախագահը նշել է, որ անցած տարի Միացյալ Նահանգներն Ուկրաինային տրամադրել է ռեկորդային գումար՝ 650 մլն դոլար, իր պաշտպանունակությունն ամրապնդելու համար, այն ներառել է «Ջավելին» հակատանկային հրթիռներ եւ զինամթերքներ։