Գառնիկ Իսագուլյանը ռազմագերի է․ Աննա Ծառուկյան (video)

Այսօր՝ փետրվարի 4-ին «Հայելի ակումբ»-ի հյուրն էր «Ազգային անվտանգություն» կուսակցության նախագահ Գառնիկ Իսագուլյանի շահերի ներկայացուցիչ՝ Աննա Ծառուկյանը։ Աննա Ծառուկյանը նշեց՝ «Պրն․ Իսագուլյանի դեմ կա հարուցված քրեական գործ Քրեական օրենսգրքի 333-րդ հոդվածի 2-րդ մասի 1-ին կետով («սուտ մատնություն, որը զուգորդվել է ծանր կամ առանձնապես ծանր հանցագործության մեջ մեղադրելով»)։ Գառնիկ Իսագուլյանի կալանքի բողոքի քննությունն արդեն երրորդ անգամ է հետաձգվում։Կա դիտավորություն՝ կոնկրետ դատական նիստ չանելու։Այսօր պարոն Իսագուլյանին լռեցնում են ոչ միայն որպես «Ազգային անվտանգություն» կուսակցության ղեկավար, քաղաքական գործիչ, նաեւ փորձ են անում լռեցնել որպես լրատվության համակարգող, տապալել լրատվության աշխատանքը, որովհետեւ պարոն Իսագուլյանը այսօր հետապնդվում է բացառապես բաց լրատվության աղբյուրներում առկա տեղեկատվությունը հավաքագրելու եւ որպես քաղաքական գործիչ գնահատական տալու հետեւանքով:
Նիստը նշանակվել էր ամսի 3-ին՝ երեկ: Գնում ենք: Բայց ճանապարհին զանգում, ասում են՝ դատավորը կորոնավիրուսով հիվանդ է եւ գործը վերամակագրվել է: Հասնում եմ դատարան ու պարզում, որ վերամակագրվել է Կարեն Բիշարյանին՝ Քոչարյանի գործով նախկին դատախազին: Աշխատակազմից հետաքրքրվում եմ, թե կա՞ նշանակված օր, պատասխանում են՝ ոչ, տվյալ դատավորը նույնպես հիվանդ է, դատական նիստ նշանակված չէ: Խոսքը երկու ամիս կալանքի մասին է: Բողոք եմ տարել հիմնավոր կասկածի վիճարկմամբ, կարող է մի պահ պարզվել,որ մենք ճիշտ ենք՝ մարդը անմեղ է»։