Սադամ Հուսեյն էլ էր ասում, որ ոչ մեկի նկատմամբ ռեպրեսիա չի իրականացվում․ Արամ Վարդեւանյան (video)
Երբեք չենք տեսնելու, որ դատախազությունը կամ ԲԴԽ-ն գան և հայտարարեն, թե իրականացնում են քաղաքական հետապնդում կամ սելեկտիվ արդարադատություն, ԱԺ-ում լրագրողների հետ զրույցում ասաց «Հայաստան» խմբակցության անդամ Արամ Վարդևանյանը։
«Ցավով պետք է նշենք, որ ԲԴԽ-ն, որը սահմանադրությամբ օժտված է այնպիսի կարգավիճակով, որ պաշտպանի և երաշխավորի դատավորների անկախությունը, իրականում ճիշտ հակառակն է անում. միաձայն որոշել են, որ պետք է հետապնդեն դատավորին», - ասաց Արամ Վարդևանյանը՝ անդրադառնալով Սյունիքի մարզի առաջին ատյանի ընդհանուր իրավասության դատարանի դատավոր Բորիս Բախշիյանի նկատմամբ քրեական հետապնդում իրականացնելու գործընթացին։
Պատգամավորի խոսքով՝ ԲԴԽ 9 անդամի մոտ հարց չի՞ առաջացել, թե ինչու են Բորիս Բախշիյանին հիշել հենց հիմա։
«Էդ ո՞նց է ստացվում։ Կամ ոնց է ստացվում, որ 2019 թվականին Դավիթ Գրիգորյանի մասին հիշեցին Ռոբերտ Քոչարյանին ազատ արձակելուց հետո։ Ցանկացած դիտորդ, որ այս ամենը տեսնի, կարող է ենթադրել, որ այստեղ ոչ մի պատահականություն չկա։ Իրավապահների մոտ երբեք պատահականություններ չեն լինում։ Հետևաբար, եթե հիմա են որոշել այսպիսի հետապնդում սկսել, վստահեցնում եմ՝ բացառապես պայմանավորված է այն հանգամանքով, որ կոնկրետ այս դատավորը վերջին ժամանակահատվածում ցուցաբերել է իրական անկախություն, այսինքն՝ կատարել է իր պարտականությունները։ Աշոտ Երկաթի գործն իշխանությունների համբերության բաժակը լցվելու վերջին փուլն էր», - ասաց Վարդևանյանը։
Ավելի վաղ հայտնել էինք, որ հունվարի 31-ին Բարձրագույն դատական խորհրդին ՀՀ գլխավոր դատախազի կողմից ներկայացվել էր երկու միջնորդություն՝ Սյունիքի մարզի ընդհանուր իրավասության դատարանի դատավոր Բորիս Բախշիյանի նկատմամբ քրեական հետապնդում հարուցելու վերաբերյալ համաձայնություն տալու մասին և դատավորին ազատությունից զրկելու վերաբերյալ համաձայնություն տալու մասին։
Խորհուրդը միաձայն որոշել է ներկայացված երկու միջնորդությունը բավարարել:
Նշենք, որ Բորիս Բախշիյանի որոշմամբ «Սիսական» ջոկատի հրամանատար Աշոտ Մինասյանն ազատ էր արձակվել:
Բորիս Բախշիյանը քննում է նաև Քաջարանի քաղաքապետ Մանվել Փարամազյանի, Գորիսի փոխքաղաքապետեր Մենուա Հովսեփյանի և Իրինա Յոլյանի քրեական գործերը։
Հետևեք մեզ Viber-ում
