Գյումրիում վրաերթից 60-ամյա հետիոտն է մահացել. փախուստի դիմած 31-ամյա վարորդը հայտնաբերվել է
Այսօր` հուլիս 9-ին «Գյումրի» բժշկական կենտրոնում մահացել է Գյումրի քաղաքի Շահումյան փողոցի բնակիչ, 60-ամյա Նորիկ Սարգսյանը: Վերջինս հիվանդանոց էր տեղափոխվել հուլիսի 7-ին` ժամը 04:50-ի սահմաններում` Գյումրի քաղաքի Շահումյան և Տերյան փողոցների խաչմերուկում անհայտ մակնիշի և համարանիշի ավտոմեքենայի վարորդի կողմից վրաերթի ենթարկվելուց հետո: shamshyan.com –ի հաղորդմամբ՝ վարորդը, վիրավորին թողնելով անօգնական, դիմել էր փախուստի: Ժամեր անց ոստիկանության Կումայրիի բաժնի ծառայողները, իրացնելով ստացված օպերատիվ հետախուզական միջոցառումներ, պարզել են վրաերթի հեղինակ-կասկածյալի ինքնությունը։ Բացատրական աշխատանքների արդյունքում ոստիկանություն է ինքնակամ ներկայացել Գյումրի քաղաքի Անի թաղամասի բնակիչ 31-ամյա Էդգար Սուքիասյանը, ով հայտնել է, որ վրաերթը կատարել է ինքը` իր կողմից վարած ՎԱԶ-2106 մակնիշի 34 RA 416 համարանիշի ավտոմեքենայով: Փաստի առթիվ Հայաստանի քննչական կոմիտեի Շիրակի մարզային քննչական վարչությունում հարուցվել է քրեական գործ ՀՀ քրեական օրենսգրքի 242 հոդվածի 2-րդ մասի հատկանիշներով:
Հետևեք մեզ Viber-ում
